Gələn il Azərbaycanda cəmi 6 349,4 min ton neft məhsullarının istehsalı proqnozlaşdırılır.
Bu barədə “2025-ci il dövlət büdcəsi haqqında” qanun layihəsində bildirilib.
Sənədə əsasən, 2026-cı ildə qeyd olunan göstərici 6 189,5 min ton, 2027-ci ildə – 6 364,2 min ton, 2028-ci ildə isə 6 185,7 min ton səviyyəsində olacağı proqnozlaşdırılır.
Qeyd etmək lazımdır ki, 2025-2028-ci illərdə neft məhsullarının istelsalında əsas pay avtomobil benzinlərinin və dizel yanacağının payına düşür.
Belə ki, 2025-ci ildə ölkə üzrə avtomobil benzinlərinin istehsalı 1 733,3 min ton, 2026-cı ildə – 1 639,8 min ton, 2027-ci ildə – 1 811,9 min ton, 2028-ci ildə isə 1 683,4 min ton olacağı proqnozlaşdırılır. Sadalanan illər üzrə ölkədə dizel yanacağı istehsalı müvafiq olaraq 2 609,2 min ton, 2 510 min ton, 2 533,3 min ton və 2 483,9 min ton səviyyəsində proqnozlaşdırılır.
Qeyd edək ki, Azərbaycanda neft, təməli 1953-cü ildə qoyulmuş Heydər Əliyev adına Bakı Neft Emalı Zavodunda emal edilir. Zavod respublikanın neft məhsullarına olan tələbatını tam ödəyir. Hazırda NEZ-də yenidənqurma və modernləşdirmə işləri aparılır.
