İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) təşəbbüsü ilə balıq bazarı ilə bağlı daxili araşdırma aparılıb.
Banker.az Agentliyə istinadən xəbər verir ki, araşdırmada Azərbaycanda balıq bazarının həcmi, bu sahənin son illərdəki inkişaf dinamikası, endemik və idxal olunan balıq növlərinin bazar payı, balığın idxal və ixracı, istehlakçıların seçiminə təsir edən amillər, eləcə də balıq istehsalı ilə əlaqədar sahibkarlıq subyektlərini və bu sahədə biznesə başlamaq istəyənləri maraqlandıran məsələlər öz əksini tapıb.
Araşdırma ilə KOBİA-nın saytından tanış olmaq mümkündür: https://bit.ly/3EirpGR
KOBİA-nın sahibkarlar arasında apardığı sorğular və daxil olmuş müraciətlər əsasında indiyə qədər Agentliyin təşəbbüsü ilə 26 daxili bazar araşdırması aparılıb. Qida və qeyri-qida sahələrini əhatə edən bu bazar araşdırmalarından sahibkarlar ödənişsiz olaraq faydalana bilərlər.
Eyni zamanda sahibkarlıq subyektləri onları maraqlandıran sahələr üzrə daxili bazar araşdırmasının aparılması üçün dövlət dəstəyi mexanizmindən faydalana bilərlər. Sahibkarın müraciəti əsasında aparılan bazar araşdırması hesabatı üzərində mülkiyyət hüququ yalnız həmin sahibkara məxsus olur və ictimaiyyətə açıqlanmır. Belə araşdırmaların aparılması üçün 20 min manata qədər dövlət dəstəyi nəzərdə tutulur. Müxtəlif sahələrdə biznesə başlamaq, yeni məhsul və xidmətlər yaratmaq istəyən KOB subyektləri bazar araşdırmasının aparılması üçün KOBİA-ya müraciət edə bilərlər. Ətraflı məlumat üçün: https://bit.ly/3sp277A
