2025-ci ilin ilk yarısında Azərbaycanın xaricə şüşə ixracı ötən ilin eyni dövrü ilə müqayisədə azalsa da, ixrac qiymətləri artıb, daxildəki zavodlar istehsalı yüksəldib.
Banker.az xəbər verir ki, 2024-cü ilin yanvar–iyun aylarında 3,319.5 min kv.m həcmində şüşə ixrac olunmuş və 9.21 mln. dollar gəlir əldə edilmişdisə, 2025-ci ildə ixrac həcmi 2,964.5 min kvadrat metr (kv.m) dəyəri isə 8.57 mln. dollara düşüb. Bu da müvafiq olaraq 10.7% və 7.1% azalmadır.
Bununla yanaşı, Dövlət Statistika Komitəsindən verilən məlumata əsasən istehsal artım göstərib – ötən il 4,100.6 min kv.m olan şüşə istehsalı bu ilin ilk yarısında 4,283.1 min kv.m təşkil edib (İllik müqayisədə: +4.4%). Bir kv.m şüşənin ixrac qiyməti 2024-cü ildə orta hesabla 2.77 dollar idisə, 2025-ci ildə 2.89 dollara yüksəlib ki, illik şüşənin orta qiyməti 4.3% bahalaşıb.
Ölkələr üzrə ixrac strukturuna baxdıqda, ən böyük artım Türkiyə bazarında müşahidə olunub. 2024-cü ildə bu ölkəyə cəmi 22.8 min kv.m (84.3 min dollar) şüşə satıldığı halda, 2025-ci ildə ixrac 2,426 min kv.m-ə (+105 dəfə), dəyəri isə 6.78 mln. dollara (+79.4 dəfə) çatıb. Bu il Bolqarıstan və Kamerun istiqamətində şüşə ixracına başlanılıb: müvafiq olaraq 223.2 min kv.m (789.3 min dollar) və 1.6 min kv.m (11.4 min dollar) həcmində satış həyata keçirilib.
Əksinə, Ukrayna bazarına ixracda kəskin azalma qeydə alınıb – ötən ilin ilk yarısında 849.4 min kv.m (2.74 mln. dollar) şüşə göndərilmişdisə, bu il həcm 173 min kv.m-ə (−79.6%), dəyər isə 500.4 min dollara (−81.7%) enib. Gürcüstan bazarında da geriləmə var – 216.3 min kv.m-dən 140.8 min kv.m-ə düşüb (−34.9%), dəyəri isə 695.6 min dollardan 490.6 min dollara enib (−29.5%). ABŞ-a ötən il 5.1 min kv.m (41.3 min dollar) ixrac olmuşdu, lakin bu ilin ilk yarısında ixrac qeydə alınmayıb.
