Azərbaycanla Rusiya arasında elmi sahədə sazişlər imzalanıb.
Cümə axşamı Rusiyanın paytaxtı Moskvada on beşinci Xəzər Enerji Forumu keçirilib, region ölkələrinin nümayəndələri bölgədə enerji təhlükəsizliyi, ekologiya və neft-qaz kompleksinin inkişafı məsələlərini müzakirə ediblər. Tədbirin yekununda bir sıra sazişlər imzalanıb.
Foruma Serqo Orconikidze adına Rusiya Dövlət Geoloji Kəşfiyyat Universiteti ev sahibliyi edib. Rusiya, Azərbaycan, Qazaxıstan, Türkmənistan və İrandan olan nümayəndələr tədbirdə qarışıq formatda – şəxsən və onlayn şəkildə iştirak ediblər. Gün ərzində enerji təhlükəsizliyinin təmin edilməsi üzrə əməkdaşlıq, neft və qazın kəşfiyyatı, hasilatı, emalı və nəqli, yaşıl enerjinin perspektivləri və avadanlıqların idxalı əvəzlənməsi mövzusunda sessiyalar və “dəyirmi masa”lar keçirilib.
Neft-qaz kompleksinin elmi müəssisələrinin nümayəndələri təqdimatlarla çıxış ediblər, əməkdaşlığın inkişafı ilə bağlı təkliflər veriblər. Forum iştirakçılara region üçün aktual məsələlər ətrafında fikir mübadiləsi aparmağa imkan verib.
Forum çərçivəsində elmi qurumlar arasında əməkdaşlıq və niyyətlərə dair 4 saziş imzalanıb. O cümlədən, Azərbaycan Elm və Təhsil Nazirliyinin akademik Həsən Əliyeva adına Coğrafiya İnstitutu Rusiya Elmlər Akademiyasının P.P.Şirşov adına Okeanologiya İnstitutunun Xəzər bölməsi və “Xəzər Dəniz Araşdırmaları Mərkəzi” federal qurumu ilə müqavilələr imzalayıb.
