2015-ci il fevral ayının 21-də Mərkəzi Bank manatın ABŞ dolları və avroya olan kursunu yenidən müəyyənləşdirmiş, ilk devalvasiya qərarını qəbul etmişdi. Nəticədə dollara nisbətən manat 33 faiz ucuzlaşmışdı. Həmin il dekabrın 21-də isə ikinci devalvasiya oldu və dollara nisbətən manat təqribən 55 faiz ucuzlaşdı. O dövrdən başlayaraq manat “üzən məzənnə” siyasətinin tətbiqi nəticəsində hər gün yumşaq şəkildə devalvasiyaya uğramaqda davam etdi.
Nəhayət bu son günlər milli valyuta dollar qarşısında möhkəmlənməyə başlayıb.
Bu gün Mərkəzi Bankın Neft Fondu ilə birgə keçirdiyi hərracda manatın məzənnəsi 1,7301 səviyyəsində müəyyən olunub.
Maraqlı məqam odur ki, xarici valyuta cüzi bahalaşan kimi ölkənin qida istehsalı, pərakəndə satış və kənd təsərrüfatı sahəsində ən böyük payı olan şirkətlərdən “Azersun Holding” MMC-nin məhsullarının qiyməti də qalxır. Amma bir neçə gündür manatın möhkəmlənməkdə davam etməsinə baxmayaraq, şirkətin istehsalı olan məhsulların qiymətində enmə görmürük.
“Azersun Holding”in İctimaiyyətlə əlaqələr departamentinin rəhbəri Afiq Səfərov xəbər portalı Modern.az-a açıqlamasında məsələyə aydınlıq gətirib.
Şirkət rəsmisi qeyd edib ki, valyuta bazarda hansı məzənnə qiymətinə satılırsa, “Azersun Holding” xaricdən məhsulu həmin valyuta ilə alır.
“Xammal ehtiyatı tədarük edirik. Həmin xammalın üzərinə daşınma xərcləri, enerji qiymətləri və s. gəldikdən sonra məhsulun qiyməti müəyyənləşdirilir”.
A.Səfərov deyib ki, qiymətlərin aşağı olması şirkətin marağındadır:
“Bizim hazırda istehsal etdiyimiz məhsulun xammalını bugünki məzənnə ilə almamışıq. Qiymətlərin aşağı olması bizim maraq dairəmizdədir. Çünki daha çox məhsul satmaqla daha çox işçi çalışdırmaqla fəaliyyət göstərmiş olarıq. Siz media populizmi ilə şirkətlərə pressinq edib qiymətləri ucuzlaşdırmaq niyyətindəsizsə, bu, yol deyil”.
“Azersun” rəsmisi bildirib ki, manatın möhkəmlənməsi uzunmüddətli olacaqsa, təbii olaraq məhsulların qiymətinə də təsir edəcək:
“Amma dolların ucuzlaşaması 2-3 gün davam edəcəksə, məzənnə qalxıb-enəcəksə, qiymətlərin tənzimlənmə amilinə təsir göstərməyəcək.
İlk devalvasiyadan sonra biz bir müddət gözlədik, qiymətləri qaldırmadıq, məhsulu maya dəyərinə təklif etdik. Amma sonra sabitlik yaranmadığından qiymətləri qaldırmaq məcburiyyətində qaldıq”.
