Balıq bazarında ciddi ucuzlaşma gözlənilir.
Balıq delikateslərinin, o cümlədən qara kürü və nərə balığının istehsalı və satışı ilə məşğul olan Həştərxan şirkətləri ilk dəfə olaraq öz məhsullarını Azərbaycana tədarük etməyə başlayıblar. Balıq satışı ilə məşğul olanlar deyirlər ki, bazara xarici məhsulların kütləvi şəkildə daxil olması qiymətləri 50 faizə qədər endirə bilər.
Sahibkarlar bildiriblər ki, bu hal bir neçə il öncə də baş verib. Nəticədə isə burada maya dəyəri 10 manat olan balıq 4 manata təklif edilib. Bu isə bazarda canlanmaya səbəb olub.
İlkin Novruzov qeyd edib ki, xaricdən gətirilən balıq məhsullarının ucuz olmasına səbəb orada istehsal müəssisələrinin çox, saxlanc yerlərinin də Azərbaycandakılardan dəfələrlə böyük olmasıdır.
Hazırda isə bazarda balıqların qiymətləri 6-18 manat arasında dəyişir.
Qeyd edək ki, Həştərxandan təkcə dondurulmuş balıq yox, həm də konservləşdirilmiş məhsullar idxal olunur.
