“Baltika-Bakı” şirkəti 15 fevral 2017-ci il tarixindən “Baltika 9” pivəsinin istehsalı və satışıba başlayacaq. Bu barədə zavoddan məlumat verilib.
“Fevralın 15-dən etibarən şirkət 0,45 litr banka qablaşmada yeni “Baltika 9” adlı pivənin istehsalı və satışına başlamağı planlaşdırır. Bir bankanın qiyməti 1,2843 manat təşkil edəcək (ƏDV və aksizlər daxil olmaqla)”, – deyə məlumatda vurğulanır.
“Baltika 9 Krepkoe” pivəsi ilk dəfə 1998-ci ildə qablaşdırılıb. Bu növ nəinki Rusiyada populyardır, həm də dünyanın təxminən 40 ölkəsinə uğurla ixrac olunur. Onların arasında Almaniya, İrlandiya, Fransa, ABŞ, hətta Meksika, Monqolustan, Cənubi Koreya kimi ekzotik ölkələr var.
Pivənin tündlüyü “Baltika”nın mütəxəssislərinin hazırladığı unikal reseptura əsasında təbii qıcqırma üsulu ilə əldə olunur.
“Baltika-Baku” pivə zavodu Xırdalan şəhərində yerləşir. “Carlsberg” Qrupunun tərkib hissəsi olan “Baltika” şirkəti zavodu 2008-ci ildə əldə edib, 2009-cu ilin may ayında isə yenidənqurma işlərindən sonra istifadəyə verib. Zavodun istehsal gücü ildə 10 milyon dekalitr təşkil edir.
“Baltika” 2008-ci il mayın 15-də Bakıda Brasseries Internationales Holding (Eastern) Ltd (BIH Eastern) ilə “Baku Castel” zavodunun alq- satqısına dair müqavilə imzalayıb. “Baltika” səhmlərin 98%-dən çoxuna sahib olub. Zavodun əldə edilməsinə dair sövdələşmə 2008-ci ilin avqustunda başa çatdırılıb. Zavodun illik istehsal gücü 10 mln. dal təşkil edir. Zavodun inkişafına investisiyalar 40 mln. manatı ötüb.
Şirkət Xırdalan, “Tuborg”, “Baltika 3”, “Baltika 7”, “Baltika 0”, “Xırdalan Draft”, “Kuler”, “Əfsanə”, “Jiqulevskoe” kimi populyar pivə brendləri istehsal edir.
