Son zamanlar ən böyük problemlərdən biri bank işçisinin, yəni mütəxəssisin öz vəzifə öhdəliyini tam icra edə bilməməsi üzündən bankın gələcəkdə real dəyərli müştərisi ola biləcək müştəriləri düzgün qiymətləndirməməsi həmin müştərinin itirilməsinə səbəb olur. Bunun bir neçə səbəbi vardır.
1. Kredit mütəxəssisinin səriştəsizliyi – bu əsasən yeni başlayan kredit mütəxəssislərinə aiddir. Belə ki, hər hansı müştəri bank məhsulları barədə məlumat almağa gələrkən kredit mütəxəssisi ona tam dolğun məlumat verə bilmir. Buda öz növbəsində bir neçə səbəbdən irəli gəlir: ya kredit mütəxəssisi həmin sahəyə baxmır və ya daxili təlimatları və öz məhsullarını yetərincə bilmir, özü üzərində işləmir. Hər bir kredit işçisi ümumi bank məhsulları haqqında məlumata malik olmalıdır ki, hər hansı müştəri müraciət etdiyi halda öz sahəsinə aid olmasa da, ona minimum 25% məlumat versin və nəzakətlə, “bəy” və ya “xanım” deyərək bildirsin ki, sizi narahat edən suallara daha ətraflı məlumat almaq üçün mən sizi həmin mütəxəssisə yönləndirim, o sizə tam dolğun məlumat verəcək. Bu halda müştəri də məmnun olur və gələcəkdə sizin və sizin bank haqqında maksimum gözəl fikirlərdə olur. Belə xidmət olunduğu halda müştəri harada olsa da, yenə də sizə və sizin işlədiyiniz banka müraciət edəcək.
2. Müştəriyə heç zaman ilk görüşdən qiymət verib tez yola salmayın – yəni elə müştərilər olur ki, adi geyimdə və ya iş paltarında yaxınlaşa bilər. Bu zaman heç vaxt müştəriyə yuxarıdan aşağı baxmayın, çalışın ki, ona maksimum xidmət göstərəsiniz. Bu həmdə sizi yoxlamaq üçün ola bilər. Həmin şəxs rəhbərlik tərəfindən göndərilə bilər ki, sizin müştərilər ilə iş vaxtı nevə davranmağınız qiymətləndirilsin. Heç bir müştəriyə fərq qoymayın, o sizin yox, bankın müştərisidir.
3. Son dərəcə səbirli və təmkinli olmaq – bu əsasən indiki dövrümüzün ən aktual problemlərindən biridir. Ona görə ki, müştərilər də adi insanlardır, yəni hamıda problem olduğu kimi onlarda da olur. Ola bilər banka yaxınlaşmadan öncə kimsə onu incidib, hansısa problemi olub, istər işdə olsun, istər də evdə. Bu halda çalışın maksimum ona rahat olmağını təmin edin. Düzdü ilk əvvəl hirsini sizə töksə də, sonda üzrxahlıq edərək sizdən üzr istəyəcək. Heç zaman müştəriyə kobud cavab verməyin və heç zaman onun yaxınlaşdığı mənfi enerji ilə, siz də ona mənfi enerji göstərməyin.
4. Heç zaman müştərini uzaqlaşdırmayın – siz bankın işçisi olsanız da çalışmalısınız ki, müştəriyə yaxın olasınız, yəni onun nə istədiyini öyrənəsiniz, nə üçün banka müraciət etdiyini və ya ona pulun hansı məqsədlə lazım olduğunu öyrənəsiniz. Çalışasınız ki, müştəri hələ ki, bankın müştərisi olmasa da, onda həmin bank haqqında müsbət təəssürat oyadasınız. Belə olduğu təqdirdə müştəri həmişə can atacaq ki, sizin bankın müştərisi olsun və qeyri ixtiyari olaraq öz ətrafındakı insanları da sizin banka cəmləyəcək. Beləcə 2*2 prinsimi ilə siz 1 müştəriyə daha dolğun məlumat verdiyiniz halda, bankınız daha çox müştəri əldə etmiş olacaq.
5. Müştərilərlə münasibətdə ayrı-seçkilik etməyin – bu əsasən ona görə lazımdır ki, bəzi kredit işçilər bir müddət işlədikdən sonra ancaq yüksək məbləğlərə can atır, yəni deyir bu müştəri az məbləğdə kredit istəyirsə mənlik deyil, tez bir zamanda özündən uzaqlaşdırır. Buda nəticə etibarı ilə müştərinin bank haqqında çox pis fikirləri formalaşdır. Həmin mütəxəssis daha anlamır ki, əvvəldə özü adi işdən başlayıb. Bu günün kiçik müştərisi sabahın VİP müştəriləri sırasında özünə yer tuta bilər, bunu unutmayın. Ona görə hər bir müştəriyə maksimum xidmət göstərin. Əgər siz dünyanın zəngin insanlarının həyatı ilə maraqlansanız görərsiniz ki, əksəriyyəti adi bir işdən başlayaraq, son nəticədə öz adlarını dünyanın zəngin insanları siyahısına salıblar.
6. Həmişə üzünüzdə gülüş və təbəssüm olsun və geyiminiz son dərəcə səliqəli olsun. Bu ilk növbədə ona görə lazımdır ki, siz özünüzdən çox bankı təmsil edirsiniz. Bu halda müştəri görsə ki, sizin səliqəli geyiminiz yoxdur pis fikir formalaşacaq. Bundan əlavə üzünüzdə təbəssüm gülüş olmasa müştərinin ürəyi açılmayacaq. Deyəcək ki, “bu niyə sir-sifətini mənə töküb” və ola bilər sizdən alığı məlumatlardan və ya göstərdiyiniz xidmətdən razı qalmayaraq şikayət etsin. Bu halın baş verməsi isə sizin gələcək perspektivinizə son dərəcə ağır zərbə ola bilər.
7. İşinizə son dərəcə məsuliyyətli yanaşın – əgər işinizdə məsuliyyətsiz olsanız tez bir zamanda ya işinizdən olarsınız və ya ən yaxşı halda töhmətlə qarşılaşa bilərsiniz. Çalışın rəhbərliyin verdiyi tapşırıqları tez bir zaman çərçivəsində maksimum dərəcədə nail olasınız. Bu sizin iş qabiliyyətinizin rəhbərlik qarşısında əyani sübutu və gələcək perspektiv üçün gözəl imkanlardandır.
