İran Milli Bankının Bakı filialı 2023-cü ili 3 milyon 871 min manat mənfəətlə başa vurub. Filial ötən ilin eyni dövründə 1 milyon 867 min manat mənfəət edib ki, bu da illik müqayisədə 2 dəfə artım deməkdir.
Banker.az bu barədə bankın maliyyə hesabatına istinadən xəbər verir.
2022-ci ildə “Bank Melli İran” Bakı filialının xalis faiz gəlirləri 3 milyon 58 min manat ikən, ötən il 3 milyon 195 min manat təşkil edib.
Bu ilin yanvar ayının 1-nə İran bankının aktivləri 121 milyon 764 min manat olub ki, bu da əvvəlki ilin sonuna nisbətən 26% çoxdur. Bunun 4 milyon 78 min manatı müştərilərə verilmiş kreditlərdir. Son 1 ildə Bakı filialının kredit portfeli 57% kiçilib.
“Bank Melli İran” Bakı filialında müştəri hesablarındakı vəsaitlər 8 milyon 904 min manatdan 44 milyon 27 min manata çatıb.
Onu da qeyd edək ki, Azərbaycan Mərkəzi Bankı (AMB) İran Milli Bankının Bakı filialının (“Bank Melli İran-Baku”) fəaliyyətini məhdudlaşdırıb. Məlumata görə, tənzimləyici qurum kredit təşkilatına məktub göndərib və hesabdan pul götürmək istisna olmaqla bütün bank əməliyyatlarının (depozit qəbulu, kredit verilməsi və s.) dayandırılmasını tələb edib.
