Bu gün Bakı Ağır Cinayətlər Məhkəməsində saxta pul dövriyyəsində təqsirləndirilən Valeh Babayev və Qadir Kərimovun cinayət işi üzrə məhkəmə prosesi başa çatıb.
Lent.az-ın məlumatına görə, hakim Eldar İsmayılovun sədrliyi ilə keçirilən prosesdə hökm oxunub. Hakimlər kollegiyasının hökmünə əsasən, V.Babayev 9 il , Qadir Kərimov isə 7 il müddətindən azadlıqdan məhrum edilib.
Qadir Kərimov məhkəmə zalından həbs edilib.
Qeyd edək ki, 2014-cü ilin dekabrında Daxili İşlər Nazirliyinin yaydığı məlumata görə, Astara rayon sakinləri Qadir Kərimov və Valeh Babayevdən saxta əskinaslar götürülüb.
Nəsimi Rayon Polis İdarəsi (RPI) 22-ci Polis Bölməsi (PB) əməkdaşları tərəfindən Astara rayon sakinləri Qadir Kərimov və əvvəllər məhkum olunmuş Valeh Babayev şübhəli şəxs qismində PB-yə gətiriliblər. Q.Kərimovdan 250.000 rubl saxta əskinas götürülüb.
Ətrafında aparılmış əməliyyat tədbirləri ilə onların, cari il noyabr ayının 23-də 28 May küçəsində yerləşən “Standart Banka” məxsus valyutadəyişmə məntəqəsinə gəlib orada işləyən Fərid Məmmədova 250.000 rubl saxta əskinas verib 3075 manat almaları müəyyən edilib.
V.Babayev və Q.Kərimov Cinayət Məcəlləsinin 204-cü maddəsi ilə ittiham olunublar.
Təqsirləndirilənlərdən Qadir Kərimov istintaq dövründə şərti azadlıqda olub.
lent.az
