30 iyun 2024-cü il tarixinə fəaliyyət göstərən 23 bankın filiallarının sayı 486, şöbələrinin sayı 91, ATM-lərin sayı 3 086 olub.
Banker.az bunu Mərkəzi Bankın statistik bülleteninə istinadən xəbər verir.
Bank işçilərinin sayında artım trendi cari ilin iyun ayında da davam edib.
Hesabat ayında bank sektorunda çalışanların sayı 0.1% və ya 35 nəfər artaraq 24 223 nəfər təşkil edib.
Fəaliyyətdə olan bankların cəmi aktivləri 50 mlrd. 328.1 mln. manat, cəmi öhdəlikləri 44 mlrd. 086.3 mln. manat, balans kapitalı 6 mlrd. 241.8 mln. manat olub.
İyun ayında bank sektorunun cəmi aktivləri və cəmi öhdəlikləri müvafiq olaraq 2.4% və 3% artmış, balans kapitalı isə 1.4% azalıb.
Mərkəzi Bank balans kapitalının azalmasını dividend ödənişləri ilə bağlı olduğnu bildirir.
KREDİTLƏR
İyun ayında bankların kredit portfeli 1.1% və ya 271.3 mln. manat artaraq 25 mlrd. 429.5 mln. manat olub.
Kredit portfelinin strukturu belədir:
ı) biznes kreditləri – 54.6% (13,874.8 mln. manat);
ıı) istehlak kreditləri – 30% (7,633.8 mln. manat)
ııı) ipoteka kreditləri – 15.4% (3,920.8 mln. manat).
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 0.6 faiz bəndi azalaraq 1.7% təşkil etmişdir.
Qeyd edilir ki, bankların öhdəliklərinin strukturunda ənənəvi olaraq depozit portfeli üstünlük təşkil edir – cəmi öhdəliklərin 79.8%-i və ya 35 mlrd. 185 mln. manat.
DEPOZİTLƏR
Depozit portfelinin 60.6%-i (21 mlrd. 304.8 mln. manat) hüquqi şəxslərin, 39.4%-i (13 mlrd. 880.3 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
Əhalinin əmanətləri (müddətli + cari hesablar) iyun ayında 3.6% və ya 480.7 mln. manat artıb. Artımın 86.5%-i (415.8 mln. manat) milli valyutada, 13.5%-i (65 mln. manat) xarici valyutada əmanətlər üzrə olmuşdur.
Fiziki şəxslərin əmanətlərinin 65.6%-i (9 mlrd. 100.4 mln. manat) milli valyutada, 34.4%-i (4,779.8 mln. manat) xarici valyutadadır. Fiziki şəxslərin əmanət portfelinin 55.8%-i (7 mlrd. 750.6 mln. manat) müddətli əmanətlərdən ibarətdir.
Hüquqi şəxslərin tələbli depozitləri 16,252.9 mln. manat olmaqla, hüquqi şəxslərin cəmi depozit portfelinin 76.3%-ni təşkil etmişdir. • Fiziki şəxslərin əmanətlərinin dollarlaşması iyun ayında əvvəlki ilin müvafiq dövrünə nəzərən isə 2.6 faiz bəndi azalaraq 33.9% təşkil edib.
GƏLİRLƏR
2024-cü ilin yanvar–iyun ayında Azərbaycan bankları tərəfindən 614 mln. manat xalis mənfəət, 875.5 mln. manat məbləğində əməliyyat mənfəəti generasiya edilib.
Bu barədə Banker.az-a Azərbaycan Mərkəzi Bankından bildirilib.
Halbuki, keçən ilin müvafiq dövründə banklar 563.3 mln. manat xalis mənfəət, 772.3 mln. manat əməliyyat mənfəəti etmişdilər.
Cari ilin 6 ayında banklar tərəfindən ümumilikdə 124.1 mln. manat məbləğində mənfəət vergisi ödənilib.
Bankların ümumilikdə gəlirləri 2 mlrd. 762.7 mln. manat təşkil edib. Öncəki ilin müvafiq dövründəki ümumi gəlirlər 2 mlrd. 267.2 mln. manat idi.
