Azərbaycanda kiçik və orta bizneslərə (KOB) verilən kreditlərin həcmi son iki rübdə azalma dinamikası ilə davam edir.
Banker.az Mərkəzi Banka istinadən xəbər verir ki, 2024-cü ilin birinci rübündə orta sahibkarlıq subyektlərinə verilən kreditlərin həcmi 433 milyon manat və ya 20% azalaraq 1 mlrd. 717 mln. manata, kiçik sahibkarlıqda isə 121 mln. manat və ya 7.65% azalaraq 1 mlrd. 464 mln. manata düşüb. Hər iki subyektlərə verilən kreditlər son iki rübdə azalmaqdadır.
Azərbaycanda 1 aprel 2024-cü il tarixinə 13 mlrd. 201.5 mln. manat biznes krediti var. Bu, ilin əvvəli ilə müqayisədə 584.75 mln. manat və ya 5% artımdır.
Artım digər sektor olan iri bizneslərə verilən kreditlərin hesabınadır. Məsələn, iri bizneslərə verilən kreditlərin həcmi 7 mlrd. 342 mln. manat olmaqla son rübdə 1 mlrd. 90 mln. manat (17%) artıb. Mikro kreditlərin həcmi isə 49 mln. manat və ya 2%-ə yaxın artımla 2 mlrd. 679 mln. manat olub.
Azərbaycanda sahibkarlıq subyektlərinin meyarları Nazirlər Kabinetinin 21 dekabr 2018-ci il tarixli 556 nömrəli Qərarındakı göstəricilərlə ölçülür:
| Sahibkarlıq subyektlərinin ölçüsünə görə kateqoriyaları | İşçilərinin orta siyahı sayı
(nəfər) |
İllik gəliri (ig) (min manat) |
| Mikro sahibkar | 1 – 10 | ig ≤ 200 |
| Kiçik sahibkar | 11 – 50 | 200 < ig ≤ 3 000 |
| Orta sahibkar | 51 – 250 | 3 000 < ig ≤ 30 000 |
| İri sahibkar | 251 və ondan yuxarı | 30 000 < ig |
