2025-ci ilin fevral ayında banklar 179.4 mln. manat xalis mənfəət, 275.2 mln. manat məbləğində əməliyyat mənfəəti əldə edilib. Halbuki, öncəki ildə xalis mənfəət 209.8 mln. manat, əməliyyat mənfəəti isə 298.3 mln. manat olmuşdu.
Banker.az bunu Azərbaycan Mərkəzi Bankının statistik bülleteninə istinadən xəbər verir.
Fəaliyyətdə olan bankların cəmi aktivləri 53 mlrd. 561.7 mln. manat, cəmi öhdəlikləri 46 mlrd. 748.4 mln. manat, balans kapitalı 6 mlrd. 813.2 mln. manat olub. Fevral ayında bankların cəmi aktivləri 0.9% (470.9 mln. manat), cəmi öhdəlikləri 0.7% (346.1 mln. manat), balans kapitalı isə 1.9% (124.8 mln. manat) artıb.
Hesabat ayında bankların kredit portfeli 0.3% və ya 77.7 mln. manat artaraq 27 mlrd. 592.4 mln. manat olub. Kredit portfelinin strukturu:
- Biznes kreditləri – 53.5% (14 mlrd. 777 mln. manat);
- İstehlak kreditləri – 31.0% (8 mlrd. 544 mln. manat);
- İpoteka kreditləri – 15.5% (4 mlrd. 271.4 mln. manat).
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 0.3 faiz bəndi azalaraq 1.6% təşkil edib.
Bankların öhdəliklərinin strukturunda ənənəvi olaraq depozit portfeli üstünlük təşkil edir – cəmi öhdəliklərin 80.9%-i və ya 37 mlrd. 837 mln. manat. Depozit portfelinin 61.6%-i (23 mlrd. 311.7 mln. manat) hüquqi şəxslərin, 38.4%-i (14 mlrd. 525.4 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
Fiziki şəxslərin əmanətlərinin 66.4%-i (9 mlrd. 649.2 mln. manat) milli valyutada, 33.6%-i (4 mlrd. 876.1 mln. manat) xarici valyutada saxlanılıb. Fiziki şəxslərin əmanət portfelinin 60.6%-i (8 mlrd. 804.6 mln. manat) müddətli əmanətlərdən ibarətdir. Fiziki şəxslərin müddətli əmanətləri fevral ayında 0.7% və ya 57.8 mln. manat artıb. Hüquqi şəxslərin tələbli depozitləri 17 mlrd. 351.8 mln. manat təşkil edərək, hüquqi şəxslərin cəmi depozit portfelinin 74.4%-ni təşkil edib.
Fiziki şəxslərin əmanətlərinin dollarlaşması 2025-ci ilin fevral ayında ötən ilin müvafiq dövrünə nisbətən 2.3 faiz bəndi azalaraq 33% olub.
28 fevral 2025-ci il tarixinə fəaliyyət göstərən 22 bankın filiallarının sayı 488, şöbələrinin sayı 89, ATM-lərin sayı 3,274 olub. Hesabat ayında bank sektorunda çalışanların sayı 0.7% və ya 182 nəfər artaraq 25,634 nəfər təşkil edib.
