ABŞ Prezidenti Cozef Bayden administrasiyası polad, sement və ağır nəqliyyatın karbonsuzlaşdırılması üçün əsas hesab edilən, yeni yaranmaqda olan hidrogen sənayesinin inkişafını sürətləndirmək üçün 62 milyon dollar ayırıb.
Bu barədə “Bloomberg” məlumat yayıb.
Bildirilir ki, maliyyə vəsaiti ağır yükdaşıyan avtomobillərdə və liman avadanlıqlarında hidrogendən istifadə texnologiyalarının işlənib hazırlanması, həyata keçirilməsi, habelə hidrogen infrastrukturunun yaradılması üçün icazə prosesinin azaldılması üzrə 20 layihəni dəstəkləyəcək.
Maliyyələşdirmənin böyük hissəsi, yəni 40 milyon dollar yük maşınları üçün standartlaşdırılmış hidrogen yanacaqdoldurma məntəqəsinin yaradılmasına həsr olunub. Bu istiqamətdə iş 15 ştatda aparılır.
Ağ Ev bildirib ki, hidrogen iqlim məqsədlərinə nail olmaq üçün vacibdir və 2030-cu ilə qədər maya dəyəri 80 % azalaraq 1 kq üçün 1 dollara qədər azalmağa başlayacaq. Materialın müəllifləri xatırladıblar ki, hidrogen bərpa olunan enerji mənbələrindən istifadə etməklə sudan hasil edilir və istixana qazı emissiyaları olmadan yanacaq yaradır.
