ABŞ Prezidenti Co Baydenin reytinqi 37%-ə düşüb ki, bu da onun vəzifəyə seçilməsindən bəri ən aşağı göstəricidir, Banker.az bu barədə Kommersant-a istinadən xəbər verir.
Tədqiqat xidməti “Gallup” qeyd edir ki, Baydenin reytinqi 2022-ci ilin iyul ayı istisna olmaqla, son 19 ayda 40% səviyyəsində olub. Sorğu göstərib ki, demokratların 83%-i və respublikaçıların 4%-i ABŞ prezidentinin öz işini necə yerinə yetirdiyini bəyənir.
Bundan əlavə, sorğu çərçivəsində amerikalılardan iqtisadiyyatdakı vəziyyəti qiymətləndirmələri istənilib. Respondentlərin 16%-i onu əla və ya yaxşı, 47%-i isə pis adlandırıb. Respondentlərin 19%-i iqtisadiyyatda vəziyyətin yaxşılaşdığını düşünür, 75%-i isə bunun əksini düşünür.
Aprelin 25-də Co Bayden rəsmi olaraq 2024-cü il seçkilərində namizədliyini irəli sürüb. O, “vəzifəsini bitirmək” üçün ona daha çox vaxt verilməsini istəyib. Ağ Ev iddia edir ki, 80 yaşlı cənab Bayden yaşı ilə bağlı iddialara baxmayaraq, müsbət nəticələr əldə edir.
