2024-cü ilin sonuna “Bakı Fond Birjası” QSC-də (BFB) listinqdə olan şirkətlərin kapitallaşmasının ümumi daxili məhsula (ÜDM) nisbəti cəmi 3% təşkil edib.
Bunu Birjanın İdarə Heyətinin sədri Ruslan Xəlilov Bakıda keçirilən 12-ci Beynəlxalq “Caspian Investment Forum”da bildirib.
“Halbuki Birləşmiş Ərəb Əmirliklərində bu nisbət 130%, Rusiyada 38%, Türkiyədə 28%, Qazaxıstanda isə 25%-dir. Azərbaycanda da bu göstəricinin bir neçə dəfə artması potensialı var”, – deyə o qeyd edib.
Bundan başqa, sədrin sözlərinə görə, maliyyələ əlçatanlığı ölkə iqtisadiyyatının inkişafında ən əhəmiyyətli ünsürlərdəndir: “Bu məsələdə kapital bazarları barədə məlumatlılığın artırılması, bu bazarların real sektora əlçatanlığının təmin edilməsi daha çox əhəmiyyət kəsb edir. Bazarların inkişafı BFB-nin “2024-2026-cı illər üzrə inkişaf strategiyası”nda çox mühüm yer tutur. Bizim strategiyada birinci irəli sürülən strateji təşəbüslər kapital bazarının artımı və dərinləşməsidir”.
