Amerikalı sahibkar və “Microsoft” şirkətinin həmtəsisçisi Bill Qeyts Hindistanda keçirilməsi planlaşdırılan beynəlxalq süni intellekt forumunda iştirakdan imtina edib. O, forumda çıxış etməli idi, lakin maliyyəçi Cefri Epşteynlə əlaqələri ilə bağlı suallar fonunda qərarını dəyişib. Bu barədə “The Guardian” qəzeti məlumat verib.
Nəşrin məlumatına görə, Qeyts planlaşdırılmış çıxışdan bir neçə saat əvvəl qəfil iştirakdan imtina edib ki, diqqət süni intellekt sahəsində prioritetlərdən yayınmasın. Milyarderin fondunun bəyanatında bildirilir ki, Qeyts vəziyyəti diqqətlə nəzərdən keçirdikdən sonra və süni intellekt sammitinin əsas prioritetlərinin diqqət mərkəzində qalmasını təmin etmək məqsədilə konfransda çıxış etməyəcək.
Bundan əvvəl Qeyts “9News” telekanalına müsahibəsində Epşteynlə ünsiyyətinə görə peşman olduğunu demişdi. Milyarderin sözlərinə görə, o, Epşteynlə 2011-ci ildə tanış olub və üç il ərzində onunla bir neçə dəfə yemək yeyib, lakin heç vaxt adasına getməyib.
Yanvarın 30-da ABŞ Ədliyyə Nazirliyi Epşteyn dosyesinə aid bütün sənədlərin dərc olunduğunu elan edib. Qaralamalarda saxlanılmış bir qeyddə Epşteyn Qeytsə cinsi yolla keçən xəstəliklə bağlı elektron məktubların silinməsi tələbi və həyat yoldaşı Melindaya gizlicə verə biləcəyi antibiotiklərin təqdim olunması xahişi ilə bağlı narazılığını yazdığı qeyd olunur.
Milyarder ABŞ Ədliyyə Nazirliyi tərəfindən yayımlanan Epşteynin məktub qaralamasını yalan adlandırıb və maliyyəçinin naməlum səbəbdən ona zərər vurmaq istədiyini ehtimal etdiyini bildirib.
