2 iyul 2024-cü il tarixində Bakı Fond Birjasında Maliyyə Nazirliyinin 364 gün olan istiqrazlarının yerləşdirilməsi üzrə hərracda orta gəlirlilik yenidən yüksəlib.
Banker.az xəbər verir ki, bir illik dövlət istiqrazlarının orta gəlirliliyi 8.28% təşkil edib. Bu sonuncu dəfə bir illik dövlət istiqrazları üzrə 4 iyun hərracındakı 8.26%-i üstələyir. Üstəlik 2020-ci ilin iyunundan bu tərəfə maksimumdur.
İstiqrazların gəlirliliyinin yüksəlməsi ona olan hərracdakı tələbin aşağı olması da təsir edir. Bununla belə, bu gün tələb də aşağı deyil və dövlət xəzinəsi yüksək gəlirlilik təklif edərək fond bazarındakı investorlara planlaşdırlan 50 milyonluq istiqraza qarşı 75 milyon manatlıq istiqraz yerləşdirilib. Bu da o deməkdir ki, hazırda Maliyyə Nazirliyi qeyd edilən faizlə istiqraz cəlbində maraqlı tərəfdir. Hərracda 16 investor 38 sifariş verib.
Bir illik dövlət istiqrazlarının gəlirliyi ilin əvvəlində 6%-in altında idi. Son illərdə isə ən aşağı gəlirlilik 2022-ci ilin mayında qeydə alınıb və 3%-ə yaxın olmuşdu.
İstiqrazların buraxılışı üzrə məlumatlar aşağıdakı kimidir:
| Emitent | Azərbaycan Respublikasının Maliyyə Nazirliyi |
| Dövlət istiqrazının növü | Diskontlu, qısamüddətli dövlət istiqrazları |
| Dövlət qeydiyyat nömrəsi – İSİN | AZ0101060082 |
| İstiqrazların tədavül müddəti | 364 gün |
| Buraxılış həcmi | 50,000,000 manat |
| Nominal dəyəri | 100 manat |
| Minimal qiymət | 90.9791 manat (9.9699%) |
| Maksimal qiymət | 92.5875 manat (8.0500%) |
| Kəsmə qiyməti | 92.3325 manat (8.3499%) |
| Ortaçəkili qiyməti | 92.3954 manat (8.2758%) |
| Reallaşdırılmış həcmi | 75,000,000 manat |
| Sifarişlərin Ümumi həcmi (nominal qiymətlə) | 197,899,100 manat |
| İnvestor sayı | 16 |
| Sifarişlərin sayı | 38 |
| Ödəmə tarixi | 01.07.2025 |
| Anderrayter | “PAŞA Kapital İŞ” QSC |
