Günlərin bir günü satış şöbəsində şöbənin yaşlı və müdrik müdiri işə yeni başlamış əməkdaşları toplayır və onlara belə bir sual verir:
– Sizcə bir satıcının ən böyük səhvi nə ola bilər?
Əməkdaşlar düşünməyə başlayırlar. Onlardan biri belə deyir:
– Hər kəsə hər şey satmaq cəhdi.
– Bu ciddi səhvdir. Hətta səhv belə deyil, bu axmaqlıqdır. Yaxşı. Başqa? – deyə şöbə müdiri soruşur.
Digər bir əməkdaş cavab verir:
– Məncə, satıcı öz üzərində işləmək istəməyəndə ən böyük səhvi edir.
– Afərin. Lakin məncə bu ən böyük səhv deyil.
Əməkdaşlardan biri də öz mülahizəsini irəli sürür:
– Bəlkə ən böyük səhv satıcının özünü müştəridən ağıllı hesab etməsidir?
– Bu yaxşı cavabdır. Kimin daha nə fikri var? – deyə müdir soruşur.
– Bəlkə satıcı öz təcrübəsini digər satıcılarla paylaşmamağı ən böyük səhvdir? – əminsizliklə bir əməkdaş deyir.
Müdir cavab verir:
-Pis fikir deyil. Bundan sonra daha cəsarətli ol, oğlum.
Əməkdaşlardan biri deyir:
-Bağışlayın, bəlkə bir satıcının ən böyük səhvi öz səhvlərini qəbul etməməsidir?
Müdir gülümsəyir və belə cavab verir:
– Afərin! Mən bilirdim ki, siz bu suala cavab verə biləcəksiniz.
Digər bir böyük səhv də var: bir satıcının daim öz işində səhv axtarması.
