“Bloomberg Intelligence” analitikləri hesab edirlər ki, əgər S&P 500 indeksi pik nöqtəsinə çatıbsa və qarşıda korreksiya gözlənilirsə, 2026-cı ildə bitcoin, mis və neft qiymətləri ciddi şəkildə enə bilər.
Bitcoin
Bitcoin aşağı istiqamətdə dönüş edib və qiymət 10 000 dollara enməyincə güclü dəstək tapmaya bilər. Pandemiyadan əvvəl və 2020-ci ilin böyük hissəsində kriptovalyuta məhz bu səviyyə ətrafında ticarət olunurdu. Qrafiklər göstərir ki, 10 000 dollar 2019-cu ildən bəri ən çox ticarət olunan səviyyədir.
Bu səviyyəyə qayıdışa nə mane ola bilər? Əgər S&P 500 artımı davam etdirərək 7000 bənd müqavimətini qırsa, bu, kriptovalyutalara maksimum dəstək verə bilər. Lakin səhmlərlə bitcoin arasındakı korrelyasiya göstərir ki, indeks 6000 bəndə düşərsə, bitcoinin qiyməti 10 000 dollara qədər enə bilər.
Mis
2019-cu ildən bəri mis üçün ən çox ticarət olunan interval 3,95–4,50 dollar/funtdur. Əgər ABŞ fond bazarı pikə çatıbsa, bu zona ilkin “cazibə nöqtəsi” ola bilər.
Hazırda misin qiyməti 5,70 dollardır. 2026-cı ildə 6,58 dollara qədər yüksəlməsi mümkündür — bu, yalnız S&P 500 7000 bəndi aşarsa daha real olar. Lakin “Bloomberg Intelligence”in baza proqnozu ABŞ səhm bazarında artan volatilliyi nəzərdə tutur və bu halda mis 4 dollar/funta qədər ucuzlaşa bilər.
Neft (WTI)
“West Texas Intermediate” markalı neftin qiyməti əvvəlcə 70 dollar/barelə qədər möhkəmlənə, lakin 2026-cı ilin sonlarına doğru 40 dollara yaxınlaşa bilər.
2019-cu ildən bəri WTI üçün ən çox ticarət olunan interval 70–75 dollar olub. Bu səviyyədən aşağı “komfort zonası” qiymətin zəngvari əyrinin aşağı hissəsinə doğru hərəkətini göstərə bilər. 2008-ci ildən bəri minimumlar təxminən 40 dollar səviyyəsində formalaşıb.
“Bloomberg Intelligence” ekspertlərinə görə, bu dəfə də ssenari fərqli olmaya bilər. 40 dollar səviyyəsinə eniş üç əsas amillə əsaslandırılır: ABŞ və Kanadada büdcə profisitinin artması; qiymət azalmasının Tramp administrasiyasının hədəflərinə uyğun gəlməsi; S&P 500 indeksinin 7000 bənddə artıq pikə çatmış ola bilməsi.
