“Bitcoin”in qiyməti ABŞ hökumətinin fəaliyyətinin dayandırılması fonunda 118 min dolları keçib, hal-hazırda kriptovalyutanın dəyəri 118 527 dollar təşkil edir.
Federal hökumət oktyabrın 1-dən qismən fəaliyyətini dayandırıb. Buna səbəb ABŞ Konqresində büdcə xərclərinin razılaşdırıla bilməməsi olub. Bu, 2019-cu ildən bəri ilk belə hadisədir. Fəaliyyətin dayandırılması nəticəsində 750 min federal məmur məzuniyyətə göndərilib.
“Bitcoin”in bahalaşması göstərir ki, investorların ona münasibəti dəyişir: artıq onu siyasi qeyri-sabitlik dövrlərində sərvəti qoruma vasitəsi kimi görürlər, CNBC yazır. Nəşr kriptovalyutanı qızılla müqayisə edir – 1 oktyabrda qızıl da yeni rekordlar müəyyən etməyə davam edib. Spot bazarda onun qiyməti artıq 3900 dollara yaxınlaşıb.
CNBC-nin məlumatına görə, Bitcoin 2025-ci ilin əvvəlindən bəri təxminən 25% bahalaşıb. Bu, Uoll-stritdə institusional investorların kriptovalyutaya daha müsbət yanaşması və onu yalnız qısamüddətli spekulyativ alət deyil, həm də tamhüquqlu investisiya portfelinin bir hissəsi kimi görmələri ilə bağlıdır.
