Bu ilin may ayında iflas edən “Bittrex” kriptovalyuta birjası platformada ticarətin 4 dekabr 2023-cü ildə dayandırılacağını açıqlayıb. Bu tarixdən sonra istifadəçilər yalnız öz vəsaitlərini çıxara biləcəklər.
Açıqlamada o da qeyd olunub ki, birjada hesabın doldurulması vəsait itkisi ilə nəticələnə bilər. Mövcud əmanətlərdən vəsaitlərin çıxarılması üçün hələlik son tarix yoxdur, lakin birja nümayəndələri bunu mümkün qədər tez etməyi məsləhət görürlər.
“Bittrex” 2014-cü ildə “Amazon” və “Microsoft”da işləyən proqram mühəndisləri tərəfindən yaradılıb. 2017-ci ildə o, Amerikanın ən böyük kriptovalyutası və dünyanın üçüncü ən böyük kriptovalyutası olub. 2019-cu ildə “Bittrex” iki platformaya bölünüb.
May ayının ortalarında “Bittrex” məhkəmədən müştərilərə hüquqi prosedurların dəyəri və gecikməsi olmadan aktivlərini geri almasına icazə verməsini istəyib. Lakin iyun ayında ABŞ səlahiyyətliləri birjanın planlarına etiraz edərək, onların “qanunsuz” olduğunu bildiriblər.
İyul ayında Florida Maliyyə Tənzimləmə İdarəsi (OFR) “Bittrex”i əyalət qanunlarını pozmaqda günahlandırıb və iflas etməmişdən əvvəl baş vermiş fırıldaqçılıq üçün şirkətə qarşı şikayət edib. Məhkəmə sənədlərində qeyd olunub ki, platforma müştəri aktivlərini dövriyyə kapitalı ilə qarışdırıb və həmçinin bəzi öhdəliklərə məhəl qoymayıb.
