Operativ yaddaş çiplərinin çatışmazlığı şirkətlərin mənfəətinə zərbə vurur, korporativ planlara təsir edir və elektronikadan tutmuş avtomobillərə qədər bir çox məhsulun qiymətini artırır, “Bloomberg” yazır. 2025-ci ilin dekabrından 2026-cı ilin yanvarına qədər bəzi yaddaş növlərinin qiyməti təxminən 75% artıb.
“Lenovo”nun baş direktoru Yan Yuançin mövcud vəziyyəti “sadəcə qısamüddətli dalğalanma deyil, struktur disbalans” adlandırıb. Onun sözlərinə görə, böhran “ən azı 2026-cı ilin sonuna qədər” davam edəcək.
“Bloomberg”in qeyd etdiyinə görə, “Sony” növbəti “PlayStation” konsolunun buraxılışını 2028 və ya hətta 2029-cu ilə təxirə salmağı nəzərdən keçirir. Bu isə şirkətin istifadəçiləri saxlamaq üçün “diqqətlə qurulmuş” strategiyasına zərbə ola bilər. Paralel olaraq Çin smartfon istehsalçıları 2026-cı il üzrə tədarük proqnozlarını yenidən nəzərdən keçirirlər — bəzi şirkətlər 20%-ə qədər azalma gözləyir.
Bununla belə, məlumat mərkəzləri (data center) üçün çiplərə tələbat artmaqda davam edəcək və 2026-cı ildə təxminən 70% yüksələcək. Nəşrin vurğuladığına görə, bu tendensiyanı “Alphabet”, “Amazon”, “Meta” və “Microsoft” kimi iri texnoloji şirkətlər gücləndirir. Onlar 2026-cı il üçün təxminən 650 milyard dollar həcmində rekord kapital xərcləri planlaşdırıblar.
“Bloomberg” bildirir ki, yaxın vaxtlarda tədarükün bərpası və operativ yaddaş qiymətlərinin normallaşması “az ehtimallıdır”. Yeni zavodların tikintisi və istismara verilməsi üçün çip istehsalçılarına illər lazım olacaq.
