Fintex xidməti Revolut əməkdaşlarına məxsus səhmlərin ikinci dərəcəli satışına başlayıb və şirkət bu proses çərçivəsində 115 milyard dollar dəyərində qiymətləndirilib. Bu barədə daxili sənədə istinadən Bloomberg məlumat yayıb.
Məlumata görə, hər bir səhm 2 017 dollar dəyərində qiymətləndirilib. Revolut-un nümayəndəsi şirkətin ikinci dərəcəli səhm satışına başladığını təsdiqləyib, lakin proses başa çatana qədər əlavə təfərrüatları açıqlamaqdan imtina edib.
Şirkətin qiymətləndirilməsi 2025-ci ilin payızından bəri əhəmiyyətli dərəcədə artıb. Həmin vaxt Revolut səhmlərini 75 milyard dollar qiymətləndirmə ilə satırdı. 2024-cü ilin avqustunda əməkdaşların səhmlərinin satışı nəticəsində şirkətin dəyəri 45 milyard dollar, 2021-ci ildə isə 33 milyard dollar qiymətləndirilmişdi.
Financial Times 2026-cı ilin aprelində mənbələrə istinadən yazmışdı ki, Revolut 150–200 milyard dollar bazar dəyərinə çatmağı hədəfləyir. Həmin vaxt şirkətin həmtəsisçisi və baş direktoru Nikolay Storonski bildirib ki, gələcəkdə Revolut-un birjada yerləşdirilməsi mümkündür, lakin bu, ən tez 2028-ci ildən sonra baş verə bilər.
Nikolay Storonski və Vlad Yatsenko Revolut-u 2014-cü ildə təsis ediblər. Şirkətin öz məlumatına görə, hazırda platformanın 75 milyondan çox müştərisi var. Revolut 2026-cı ilin iyununda BƏƏ-də bank lisenziyası alıb, iyul ayında isə Revolut Bank Australia fəaliyyətə başlayıb.
