Bloomberg mənbələrə istinadən yazır ki, neobank “Revolut” Türkiyə bazarına daxil olmaq üçün Türkiyənin rəqəmsal bankı FUPS-un alınması ilə bağlı danışıqlar aparır.
Mənbənin bildirdiyinə görə, hələlik yekun qərar qəbul edilməyib və sövdələşmənin baş tutacağına dair tam əminlik yoxdur. Əgər banklar razılığa gələrsə, müqavilə Türkiyənin bank tənzimləyicisi — BDDK tərəfindən təsdiqlənməlidir.
Revolut “bazar şayiələri və spekulyasiyaları” şərh etmədiyini bildirib, Türkiyənin FUPS bankı isə şərh verməkdən imtina edib.
“Bloomberg Intelligence”in aparıcı sahə analitiki Tomaş Noetzel qeyd edib ki, “Revolut”un Türkiyə bazarına mümkün çıxışı artıq inkişaf etmiş rəqəmsal texnologiyalara malik, lakin hələ də filial şəbəkəsindən asılı olan oyunçuların fəaliyyət göstərdiyi sektorda rəqabəti gücləndirəcək. Onun sözlərinə görə, bu sövdələşmə qiymət və istifadəçi təcrübəsindən kənara çıxan fərqləndirmə baxımından həlledici rol oynaya bilər.
“Revolut” 2015-ci ildə rusiyalı Nikolay Storonski və ukraynalı Vlad Yatsenko tərəfindən təsis edilib. Milyarder Storonski 2022-ci ildə Rusiya vətəndaşlığından imtina edib. Yanvarın 7-nə olan məlumata görə, o, “Forbes Real-Time Billionaires” qlobal reytinqində dünyanın ən varlı insanları siyahısında 229-cu yerdə qərarlaşıb, sərvəti isə 13,1 milyard dollar dəyərində qiymətləndirilir.
Dekabrın sonunda Storonski “Revolut”un iki–üç il ərzində ilkin səhmlərin yerləşdirilməsini (IPO) keçirə biləcəyini bildirib. Onun sözlərinə görə, şirkət üçün ABŞ birjasına çıxmaq daha sərfəli olar.
