Qəhvə şəbəkəsi “Starbucks” Çində biznes qurmaq və onun necə inkişaf etdirə biləcəyi ilə bağlı fikirləri öyrənmək üçün bir sıra potensial investorlara məktublar göndərib. Xüsusilə, şirkətin payının mümkün satışı variantı nəzərdən keçirilir, “Bloomberg” yazır.
Agentliyin mənbələrinə görə, aktivlər bir neçə milyard dollar dəyərində qiymətləndirilə bilər. Aprelin sonunda “Starbucks”ın CEO-su Brayan Nikol məhsul təklifləri və qiymətlərdəki dəyişikliklərdən sonra Çində inkişafın əldə edildiyini açıqlayıb. Həmin vaxt o, şirkətin “uzunmüddətli perspektivdə” bu ölkəyə fokuslandığını qeyd edib.
2024-cü ilin oktyabrında Nikol “Starbucks”ın uzunmüddətli perspektivdə ona kömək edəcək tərəfdaşlıqlar araşdırdığını söyləyib, lakin nə demək istədiyini açıqlamayıb.
Ötən noyabrda “Bloomberg” “Starbucks”ın Çindəki əməliyyatlarını qiymətləndirdiyini bildirmişdi. O zaman şirkət ölkədə makroiqtisadi və rəqabət təzyiqləri ilə üzləşib, çünki bazara “Luckin Coffee” və “Cotti Coffee” kimi yerli oyunçular ortaya çıxıb.
