Avropa ölkələrinin ABŞ-nin hərbi dəstəyindən asılılığı azaltmağa və öz müdafiə potensialını gücləndirməyə çalışdığı bir vaxtda Türkiyənin NATO-dakı rolu getdikcə artır.
Agentliyin qiymətləndirməsinə görə, Ankara öz hərbi-sənaye kompleksinin inkişafı və silah ixracının artması sayəsində alyansın getdikcə daha mühüm üzvünə çevrilir. Türkiyə şirkətləri NATO müttəfiqlərinə pilotsuz uçuş aparatları, zirehli texnika, gəmilər, təlim-döyüş təyyarələri və radioelektron mübarizə sistemləri daxil olmaqla geniş çeşiddə məhsullar tədarük edir.
Bloomberg qeyd edir ki, Türkiyə Prezidenti Rəcəb Tayyib Ərdoğan qarşıdan gələn NATO sammitindən ölkəsinin alyansdakı mövqeyini gücləndirmək üçün istifadə etmək niyyətindədir. Agentliyin məlumatına görə, Ankara müdafiə xərclərinin müttəfiqlər arasında daha ədalətli bölüşdürülməsinə və hərbi təyinatlı məhsulların ticarətinə qoyulan məhdudiyyətlərin aradan qaldırılmasına nail olmağa çalışır.
Bloomberg vurğulayır ki, 2024-cü ildə Türkiyənin müdafiə sənayesi məhsullarının ixracının təxminən 56%-i ABŞ, Avropa ölkələri və digər NATO müttəfiqlərinin payına düşüb. 2020-ci ildən bəri Türkiyənin hərbi-sənaye kompleksinin xarici satışlarının həcmi dörd dəfə artaraq ildə təxminən 10 milyard dollara çatıb.
Agentliyin qeyd etdiyi kimi, Türkiyənin rolunun güclənməsi ABŞ-nin regiondakı hərbi mövcudluğunu azaltması və Ukraynadakı münaqişənin davam etməsi fonunda Avropa dövlətlərinin təhlükəsizlik məsələlərinə yanaşmasını yenidən nəzərdən keçirməsi ilə eyni vaxta təsadüf edir.
