Neft qiymətləri çərşənbə axşamı Yaxın Şərqdə müharibəyə son qoyacaq razılaşma perspektivlərinin zəifləməsi fonunda yüksəlib. İranın daha hücum xarakterli hərbi mövqeyə keçəcəyini açıqlaması və ABŞ-ın mövcud atəşkəs razılaşmasının uzadılmasını istisna etməsi enerji təchizatına dair narahatlıqları artırıb.
Banker.az xəbər verir ki, Brent markalı neftin fyuçersləri Bakı vaxtı ilə səhər saatlarında 62 sent və ya 0,7% bahalaşaraq bir barel üçün 91,49 dollara yüksəlib. ABŞ-ın WTI markalı neftinin fyuçersləri isə 75 sent və ya 0,9% artaraq 85,25 dollar olub. Hər iki göstərici əvvəlki sessiyada son həftələrin ən yüksək səviyyəsinə çatıb.
ABŞ və İsrailin fevralın 28-də İrana qarşı başlatdığı hücumlarla başlayan münaqişənin dayandırılması üzrə danışıqlarda irəliləyişin dayanması və Hörmüz boğazından neft tankerlərinin hərəkətinin bərpa olunmaması bazarda təchizat risklərini artırır. Çərşənbə axşamı boğazdan çıxan gəmi mərmi hücumuna məruz qalıb. Hücumlar səbəbindən boğazdan keçən gəmilərin sayı hələ də minimum səviyyədədir.
Yəməndəki husilər də Qırmızı dənizdə gəmilərə raket hücumu həyata keçirib. DBS Bank analitiki Suvro Sarkarın fikrincə, razılaşmanın olmaması neft qiymətlərinin 2026-cı ilin son rübündə və 2027-ci ildəki gözləntilərinə təsir göstərə bilər. O, yaxın müddətdə neftin bir barelinin 80-100 dollar diapazonunda qalacağını gözləyir.
Bu arada, Reuters-in ilkin sorğusuna görə, ABŞ-da xam neft ehtiyatlarının ötən həftə azalması, həmçinin neft məhsulları ehtiyatlarının da geriləməsi gözlənilir.
