Avropada ən çox qanunsuz miqrant Böyük Britaniyada yaşayır.
Bu barədə “The Daily Telegraph” Oksford Universitetinin mütəxəssislərinin araşdırmasına istinadən məlumat yayıb.
Onların sözlərinə görə, Böyük Britaniyada 745 minə qədər qeyri-qanuni miqrant var ki, bu da Fransadan təxminən 2.5 dəfə çoxdur. Fransada bu rəqəm 300 minə yaxındır.
Bu göstərici üzrə ikinci yeri 700 minə qədər qeyri-qanuni miqrantın yaşadığı Almaniya tutur.
İlin əvvəlindən Böyük Britaniyaya 26,6 min qeyri-qanuni miqrant La-Manş boğazı boyunca şişmə qayıqlarla gəlib ki, bu da eyni dövr üçün 2023-cü ilin göstəricilərindən 5% çoxdur.
Oktyabrın 5-də krallığa qeyri-qanuni yollarla 973 nəfər daxil olub ki, bu da bu ilki gündəlik göstəricidə rekord həddir.
Baxmayaraq ki, bu mövzu “Brexit”in əsas səbəblərindən biri idi Böyük Britaniyada qeyri-qanuni miqrasiya problemi ölkənin Avropa İttifaqından çıxmasından sonra daha da pisləşib. 2018-ci ildən bəri 130 minə yaxın qeyri-qanuni miqrant La-Manş boğazını keçərək krallığa daxil olub.
İyulun 4-də keçirilən parlament seçkilərindən sonra ölkənin Leyboristlər Partiyası tərəfindən qurulmuş hökuməti Böyük Britaniyaya qanunsuz miqrant axınının qarşısını almaq üçün Aİ dövlətləri ilə əməkdaşlığı gücləndirəcəyini vəd edib.
