İngiltərə bankının yeni £5 nominalında olan banknotun üzərində qrammatik səhv aşkarlanıb.
Banker.az saytının The Telegraph nəşrinə istinadən verdiyi məlumata görə, banknotun üzərində ölkənin keçmiş baş naziri Uinston Çörçillin portretinin yanında onun sitatı yer alıb: “Mən sizə qan, əmək, göz yaşı və tərdən başqa bir şey təklif edə bilmərəm (I have nothing to offer but blood, toil, tears and sweat)”. Məsələ ondadır ki, dövriyyəyə buraxılan bu yeni banknotların üzərində sitat dırnaq işarəsi ilə qeyd edilməyib, cümlənin sonunda isə nöqtə unudulub.
İngiltərə bankı hələ ki, məsələ ilə bağlı şərh bildirməyib.
Oksford universitetinin professoru Tar Stabb-ın sözlərinə görə, yol verilmiş bu səhv səbəbindən elə təəssürat yaranır ki, sitat Çörçillə deyil, məhz valyutanın özünə aiddir. O belə hesab edir ki, cümlədə durğu işarəsi mütləq olaraq qoyulmalı idi.
Qeyd edək ki, İngiltərə bankı ilk plastik banknotların nümunələrini 2016-cı ilin 2 iyun tarixində ictimaiyyətə təqdim etmişdi. Yeni banknotların buraxılmasına isə elə həmin ilin sentyabr ayında başlanılmışdı.
