Beynəlxalq Valyuta Fondu (BVF) dünya ÜDM-nin 2026-cı ildə 3,3%, 2027-ci ildə isə 3,2% artacağını proqnozlaşdırır. Bu göstəricilər BVF-in dünya iqtisadiyyatının inkişaf perspektivlərinə dair növbəti hesabatında yer alıb.
Hesabatda qeyd olunur: “Qlobal iqtisadi artımın dayanıqlılığını qoruyacağı və 2026-cı ildə 3,3%, 2027-ci ildə isə 3,2% təşkil edəcəyi gözlənilir. Bu göstəricilər 2025-ci ilin yekunları üzrə 3,3% səviyyəsi ilə müqayisə edilə bilər”. Beləliklə, BVF 2026-cı il üzrə proqnozunu 2025-ci ilin oktyabrında dərc olunmuş əvvəlki hesabatla müqayisədə 0,2 faiz bəndi artırıb.
BVF analitikləri vurğulayırlar ki, gömrük rüsumları və onlarla bağlı bazarlardakı qeyri-müəyyənlik qlobal iqtisadi fəallığa təsir göstərməkdə davam edəcək, “lakin bu təsirin 2026–2027-ci illərdə zəifləyəcəyi gözlənilir”. Hesabat müəlliflərinin fikrincə, ticarət siyasətindəki məhdudlaşdırıcı amillər “texnologiyalara, o cümlədən süni intellekt sahəsinə investisiyaların kəskin artımı” ilə kompensasiya olunur.
