Çinli avtomobil istehsalçısı BYD 2015–2022-ci illər arasında istehsal edilmiş Tang və Yuan Pro seriyalı 115 mindən çox avtomobili geri çağıracağını açıqlayıb. Bu, şirkətin bu günə qədər həyata keçirdiyi ən böyük geri çağırma kampaniyasıdır. Qərar batareyalarla bağlı təhlükəsizlik riskləri və konstruksiya qüsurları səbəbilə Çin Bazar Nəzarəti İdarəsinin 17 oktyabr tarixli məlumatında bildirilib.
BYD şirkəti 2015-ci ilin martından 2017-ci ilin iyulunadək istehsal edilmiş 44 535 ədəd Tang model avtomobilin geri çağırılması planını Dövlət Bazar Nəzarəti İdarəsinə təqdim edib. Məlumata görə, bu avtomobillərdə bəzi komponentlərin konstruktiv qüsurları onların qeyri-normal işləməsinə səbəb ola bilər.
Şirkət həmçinin 2021-ci ilin fevralından 2022-ci ilin avqustunadək istehsal olunmuş 71 248 ədəd Yuan Pro elektromobilini batareya quraşdırılması ilə bağlı istehsal problemlərinə görə geri çağırmağa qərar verib.
Yanvar ayında BYD 6843 ədəd Fangchengbao Bao 5 hibrid SUV modelini yanğın riski səbəbilə geri çağırmışdı.
Bundan əvvəl, 2024-cü ilin sentyabrında, şirkət Dolphin və Yuan Plus modellərindən ibarət təxminən 97 min elektromobili geri çağırmışdı. Səbəb — sükan idarəetmə blokundakı istehsal nasazlığı idi ki, bu da yanğın təhlükəsi yaradırdı.
