Çinin xarici işlər naziri Qin Qang Pekində “Tesla” və “SpaceX”in qurucusu və “Twitter” sahibi İlon Maskla görüşüb. Bu barədə Çin Xarici İşlər Nazirliyinin mətbuat xidməti məlumat yayıb, Banker.az bu barədə Vedomosti-yə istinadən xəbər verir.
“Mayın 30-da Çin Dövlət Şurasının üzvü və xarici işlər naziri Qin Qang “Tesla” şirkətinin baş direktoru İlon Maskla görüşüb”, – mesajda deyilir.
Görüş zamanı amerikalı iş adamı bildirib ki, ABŞ və Çinin maraqları “bir-birindən ayrılmazdır”. Mask həmçinin Çin xalqının çalışqanlığını və zəkasını qeyd edib və əlavə edib ki, “Tesla” Çindəki biznesini genişləndirməyə hazırdır.
ABŞ və Çin arasındakı əməkdaşlıqdan danışan Qin Qang “Tesla” sürmək ilə bənzətmə aparıb. “Əyləcləri vaxtında basın və “təhlükəli sürməkdən” çəkinin, həmçinin qarşılıqlı faydalı əməkdaşlığa kömək etmək üçün “qaz pedalını sıxmağı” bacarın”, – xarici işlər naziri deyib.
Mayın 29-da “Reuters” mənbələrə istinadən yazıb ki, Mask gələn həftə Çinə səfər edəcək. Agentliyin məlumatına görə, sahibkar hökumət rəsmiləri ilə görüşəcək və Şanxayda “Tesla” zavoduna baş çəkəcək.
