“Citigroup” bazar ertəsi Brent markalı neft üzrə qiymət proqnozlarını yenidən nəzərdən keçirərək 2026-cı ilin üçüncü və dördüncü rübləri üçün hədəf qiymətləri müvafiq olaraq bir barel üçün 75 və 70 dollara endirib.
Bankın məlumatına görə, bu qərar ABŞ və İran arasında qarşılıqlı anlaşma memorandumunun imzalanmasından sonra Hörmüz boğazı vasitəsilə ticarət axınlarının bərpa olunacağı və normallaşacağı gözləntilərinə əsaslanır.
“Citigroup”un analitik icmalında həmçinin 2027-ci il üzrə Brent neftinin qiymət proqnozu bir barel üçün 80 dollardan 65 dollara endirilib. Bu, bazarın inkişafı ilə bağlı daha nikbin ssenarini əks etdirir.
Bank ehtimalı 60% qiymətləndirilən yeni baza ssenarisini təqdim edib. Həmin ssenariyə əsasən, memorandum imzalanacaq və iyulun ortalarına və ya sonuna qədər Hörmüz boğazı vasitəsilə neft axınları sabit şəkildə bərpa olunacaq. ABŞ prezidenti Donald Tramp də iki ölkə arasında memorandumun imzalandığını təsdiqləyib.
“Citigroup” analitikləri qeyd ediblər ki, bazar hazırda uzunmüddətli və sabit neft axınlarına zəmanət verən yekun sazişi deyil, məhz memorandumu qiymətləndirir. Onların fikrincə, əks halda neft qiymətləri hazırkı səviyyədən bir barel üçün 10–15 dollar daha aşağı ola bilərdi.
Broker şirkəti həmçinin ABŞ-nin münaqişəni yenidən alovlandırmaq istəyinin məhdud olduğunu və İranın danışıqlarda iştirak etməyə hazır olduğunu vurğulayıb. Bu amillər yay aylarında neft bazarında satış strategiyasını dəstəkləyir.
Eyni hesabatda “Citigroup” qızıl üzrə 0–3 aylıq proqnozunu bir unsiya üçün 4 000 dollardan 4 500 dollara, gümüş üzrə proqnozunu isə 60 dollardan 70 dollara yüksəldib. Bank bunu risklərə münasibətin yaxşılaşması ilə əlaqələndirib.
Bununla yanaşı, “Citigroup” qızıl üzrə 6–12 aylıq dövr üçün bir unsiya başına 5 000 dollarlıq optimist proqnozunu qüvvədə saxlayıb, lakin bazarda yüksək volatilliyin mümkünlüyü barədə xəbərdarlıq edib.
Bank həmçinin ABŞ və İran arasında memorandumla bağlı xəbərlərdən sonra baş verən satışlara baxmayaraq, qiymət enişləri zamanı alüminium alınmasını tövsiyə edib.
