“CoinDesk” kriptovalyuta platformasının sahibi “Bullish” şirkəti ABŞ-də IPO nəticəsində 1.1 milyard dollar toplayıb, bu barədə “Bloomberg” agentliyi məlumat yayıb.
Bildirilir ki, “Bullish” biri 37 dollar qiymətinə 30 milyon səhm satıb. Şirkət əvvəlcə 28-31 dollar qiymət aralığında 20.3 milyon səhm satmağı planlaşdırsa da, sonradan IPO-nun həcmini artırıb.
“BlackRock” və “ARK Investment Management” investisiya fondları xüsusi maraq göstərib: onlar ümumilikdə 200 milyon dollara qədər “Bullish” səhmlərini əldə etməkdə maraqlı olduqlarını bildirib.
“Bloomberg”ə görə, IPO-dan sonra “Bullish”in kapitallaşması 5.4 milyard dollar təşkil edib. Səhmlərin ticarətinin Nyu-York Birjasında BLSH tikeri ilə başlayacağı gözlənilir.
Xatırladaq ki, “Bullish” hələ 2021-ci ildə birjaya çıxmaq istəyib. Lakin sövdələşmə 2022-ci ildə ABŞ-də faiz dərəcələrinin artması səbəbindən fond bazarının düşməsi fonunda baş tutmayıb. 2025-ci ilin iyun ayında “Bullish” ikinci dəfə IPO üçün müraciət edib.
Tramp administrasiyasının rəqəmsal aktivlərə dəstəyi fonunda son vaxtlar getdikcə daha çox kriptovalyuta şirkəti ABŞ birjalarında siyahıya alınıb. Ən çox diqqət çəkən kriptovalyuta yerləşdirməsi USDC stabilkoinin emitenti olan “Circle”ın IPO-su olub. İyun ayının ilk ticarət günündə şirkətin kotirovkaları 168.5% bahalaşıb. Avqustun 11-də ticarətin bağlanışına qədər “Circle” səhmləri 163.21 dollar dəyərində olub ki, bu da IPO qiymətindən 426.5% yüksəkdir.
