Şirkətə yeni investisiya raundu və birjaya çıxışa hazırlıq ərəfəsində əlavə maliyyə vəsaiti lazımdır.
Bloomberg şirkətin rəsmi bildirişinə istinadən yazır ki, DeepSeek qiymətləri “əhəmiyyətli dərəcədə” artıracağını açıqlayıb. Lakin bahalaşmanın nə vaxt baş verəcəyi və qiymətlərin nə qədər yüksələcəyi bildirilməyib. Şirkət istifadəçiləri yalnız xərclərini əvvəlcədən planlaşdırmağa çağırıb.
Hazırda DeepSeek V4 Flash modeli üçün 1 milyon giriş tokeninə görə 0,14 dollar, 1 milyon çıxış tokeninə görə isə 0,28 dollar tələb edir. Müqayisə üçün, Kimi K3 modelinin tərtibatçısı olan Çinin Moonshot şirkətində qiymətlər 1 milyon giriş tokeni üçün 3 dollar, çıxış tokeni üçün 15 dollardır. Anthropic-in Fable 5 modeli üzrə bu göstəricilər müvafiq olaraq 10 və 50 dollar təşkil edir.
Nəşr qeyd edir ki, DeepSeek-in qiymətləri artırmaq qərarı Çinin süni intellekt bazarı üçün “dönüş nöqtəsi” ola bilər. Çünki bazarın bir çox iştirakçısı indiyədək şirkətin nümunəsini izləyərək modellərini aşağı qiymətlərlə təklif edirdi.
Lakin DeepSeek hazırda yeni investisiya raundunu müzakirə edir və eyni zamanda birjaya çıxmağa hazırlaşır. Buna görə şirkətin təsisçisi Lyan Venfen investorların gözləntiləri, bazarın sürətli genişlənməsi və hesablama infrastrukturunun qurulmasına çəkilən kapital xərclərinin artması arasında tarazlıq yaratmalı olacaq.
Qiymətlərin istənilən səviyyədə artırılması şirkətin tərəfdaşlarına, məsələn, DeepSeek modellərinə çıxış imkanı verən xidmətlərə təsir göstərəcək. Bununla belə, şirkətin bir çox modeli açıq mənbə şəklində təqdim olunduğuna görə, digər şirkətlər onları öz serverlərində işə sala və alternativ qiymətlər təklif edə biləcəklər.
DeepSeek Çinin Zhejiang High-Flyer Asset Management hedc fonduna məxsusdur. Fondun həmtəsisçisi Lyan Venfen layihəni 2023-cü ildə başladıb. Bloomberg-in məlumatına görə, 14 iyul 2026-cı ildə Lyan dünyanın ən varlı süni intellekt şirkəti rəhbərinə çevrilib. Onun sərvəti 36 milyard dollar qiymətləndirilir.
Startap Silikon Vadisində diqqəti 2024-cü ilin noyabrında düşünmə qabiliyyətinə malik R1 modelinin ilkin versiyasını, 2025-ci ilin yanvarında isə tam versiyasını təqdim etdikdən sonra cəlb edib.
DeepSeek 2026-cı ilin aprelində 1,6 trilyon parametrə malik V4-Pro və 248 milyard parametrə malik V4-Flash modellərini təqdim edib. Reuters iyul ayında bildirmişdi ki, şirkət Nvidia həllərindən asılılığını azaltmaq üçün öz süni intellekt çipini hazırlayır.
