Danimarkanın “Saxo Bank”ı 2025-ci il üçün “şokedici proqnozlar” dərc edib. İnvestisiya bankı Trampa görə dolların kəskin ucuzlaşacağını. “Nvidia”nın kapitallaşmasının “Apple”ın kapitallaşmasını iki dəfə keçəcəyini və OPEC-in elektrik avtomobillərinə olan marağa görə dağılacağını proqnozlaşdırıb.
“Tramp dolları partladacaq”. “Saxo Bank” bildirir ki, 2025-ci ildə Tramp administrasiyası ABŞ-nin digər ölkələrlə münasibətlərini tamamilə yeniləyəcək, İlon Maskın rəhbərlik etdiyi Hökumətin Effektivliyi Departamentinin (D.O.G.E) köməyi ilə idxal mallarına böyük tariflər tətbiq edəcək və büdcə kəsirini azaldacaq. Nəticədə, dollar qıtlığı yaranacaq və qlobal maliyyə oyunçuları başqa alternativlərə əl atacaqlar. Analitiklərin fikrincə, ABŞ iqtisadiyyatı reflyasiya yaşayacaq, əmək haqları isə əmtəə inflyasiyasına uyğun olaraq yüksələcək.
“Nvidia-nın kapitallaşması Apple-ı iki dəfə üstələyəcək”. 2025-ci ildə “Nvidia”nın uğuru yüksək performans göstərən “Blackwell” çipləri sayəsində artacaq. Süni intellekt sahəsindəki “silahlanma yarışı”, məlumat mərkəzlərinin artan enerji xərcləri və “Blackwell”ə böyük tələbat “Nvidia”nı tarixin ən gəlirli şirkəti edəcək. Analitiklərin fikrincə, onun kapitallaşması 7 trilyon dollara çata bilər ki, bu da qlobal bazarın 10%-dir. “Nvidia” səhmləri 250 dollardan yuxarı qalxacaq, lakin sonra bazar onun mənfəəti artırmaq qabiliyyətinə şübhə etməyə başlayacaq və perspektivlər pisləşəcək.
“Çin iqtisadiyyatın stimullaşdırılmasına 50 trilyon yuan ayıracaq”. Çin iqtisadi tarixdə görünməmiş korporativ və daşınmaz əmlak borcu ilə üz-üzədir. Ölkənin təkcə korporativ borcu ÜDM-in 150%-ni ötür, yerli hökumətlərin borcu isə daha 80-90% təşkil edir. Ev təsərrüfatlarının borcu digər ölkələrdəki kimi yüksək olmasa da, bu, daşınmaz əmlak bazarındakı problemlərlə əlaqəlidir. Analitiklər deyirlər ki, 2025-ci ildə və ondan sonrakı illərdə Çin 50 trilyon yuandan (7 trilyon dollar) çox dəyərində “nəhəng fiskal tədbirlər paketi” qəbul edəcək. Bu məbləğin böyük hissəsi borcu ödəməyə deyil, rəqəmsal yuan vasitəsilə istehlakçılara xərclənəcək.
“Bioprinterdə yaradılan süni insan ürəyi uzunömürlülüyün yeni dövrünü açacaq”. 2025-ci ildə alimlər bioprinterdən istifadə edərək, tam funksional insan ürəyi yaradacaqlar. Bu nailiyyət donor orqanların çatışmazlığı problemini aradan qaldıracaq və nasaz orqanların dəyişdirilməsi üçün süni orqanların sifarişlə düzəldilməsi sayəsində insan ömrünün uzadılmasına yol açacaq. Orqan bioçapındakı irəliləyişlər biotexnologiya və 3D çap sektoruna marağın artmasına səbəb olacaq. Uzunmüddətli perspektivdə innovasiya və investisiya səhiyyə sənayesini dəyişdirəcək, bu da xəstələrin nəticələrinin yaxşılaşmasına və əhəmiyyətli iqtisadi artıma gətirib çıxaracaq.
“Elektrifikasiya nəticəsində OPEC süquta uğrayacaq”. Elektrikli avtomobillər istehsal gücünün artması və akkumulyatorların qiymətlərinin aşağı düşməsi səbəbindən benzin analoqlardan daha ucuz olacaq. Neftin üçdə ikisi benzinə və dizelə xərcləndiyindən, OPEC onun əhəmiyyətinin azaldığını başa düşəcək. Nəticədə, təşkilat fəaliyyətini dayandıracaq, onun keçmiş üzvləri isə neft hasilatını maksimuma çatdıracaq, bu da neftin qiymətinin əhəmiyyətli dərəcədə aşağı düşməsinə səbəb olacaq. Bununla belə, analitiklərin fikrincə, Şimali Amerikada bahalı şist neft hasilatı dayandıqca qiymətlər yenidən sabitləşəcək.
“ABŞ enerji qiymətlərinin yüksək olması səbəbindən süni intellekt məlumat mərkəzlərinə vergi tətbiq edəcək”. “AI inqilabı” çox enerji tələb edir, texnoloji nəhənglər sabit və uzunmüddətli mənbələri təmin etmək üçün artıq addımlar atır, lakin “Microsoft”, “Google” və “Amazon” layihələri 2030-cu il və sonrakı illər üçün nəzərdə tutulub, “Saxo” xatırladır. 2025-ci ildə analitiklərin proqnozlarına görə, ABŞ-də elektrik enerjisinin qiymətləri əhalinin sıx məskunlaşdığı bir neçə bölgədə kəskin artacaq, çünki ən böyük texnologiya şirkətləri onu məlumat mərkəzlərinə xərcləyəcəklər. Bu, məişətdə kommunal ödənişlərin qalxacağı üçün ictimaiyyətin qəzəbinə səbəb olacaq. Problemi aradan qaldırmaq üçün yerli hakimiyyət orqanları süni intellekt məlumat mərkəzlərinə vergi tətbiq edəcək, bu isə günəş enerjisi fermalarına investisiyaları təşviq edəcək.
“Təbii fəlakət böyük sığorta şirkətini müflis edəcək”. İqlim dəyişkənliyi Yerin su dövranının intensivləşməsinə səbəb olur, bu isə bir sıra ölkələrdə ölümcül daşqınlar kimi hadisələrə gətirib çıxarır. Analitiklər 2025-ci ildə ABŞ-nin fəlakətli fırtına yaşayacağını proqnozlaşdırırlar. Amerikanın ən böyük sığortaçılarından biri iqlim dəyişkənliyi ilə bağlı sığorta risklərini olduğundan aşağı qiymətləndirəcək. İddiaları aradan qaldırmaq üçün vəsait çatışmadığına görə çaxnaşma bütün sənayeyə yayılacaq. Nəticədə, böhran baş verəcək. Sığorta məsələləri ilə bağlı fəlakət əmlakın dəyərini əhəmiyyətli dərəcədə azaldacaq. Eyni zamanda, Uorren Baffetin investisiya şirkəti “Berkshire Hathaway”in səhmləri yüksələcək, çünki o, çaxnaşmadan sağ çıxmaq üçün kifayət qədər kapitala malikdir və bazar payını artıracaq.
“Funt-sterlinq Brexit-dən sonrakı itkiləri bərpa edəcək”. Avropa iqtisadi çətinliklərlə üzləşərkən, Böyük Britaniyada səlahiyyətlilər 2025-ci ilə qədər olan dövr üçün büdcə prioritetlərini açıqlayıblar. Təqaüdçülərə qış yanacağı yardımı kimi subsidiyalar azaldılacaq, daşınmaz əmlaka və istehsalata investisiyaların stimullaşdırılması üçün tədbirlər görüləcək, büdcə işçilərinin gəlirləri artırılacaq. İngiltərə Bankının uçot dərəcəsi digər ölkələrə nisbətən yüksək olaraq qalacaq və ölkə gələcək illərdə güclü nominal artım görəcək. Bankın proqnozuna görə, 2025-ci ildə funt sterlinq avroya nisbətdə 1.27-yə yüksələcək. Daxili investisiyaların təşviqi və güclü artım perspektivləri Britaniya valyutasını avroya qarşı dəstəkləyəcək.
