Son yarım əsrdə Birləşmiş Ərəb Əmirlikləri (BƏƏ) təhsil sektorunda böyük irəliləyişlər əldə edib. Əgər 1970-ci illərdə əhalinin yarıdan az hissəsi oxuyub yaza bilirdisə, bu gün savadlı əhalinin çəkisi 95%-i ötür, təhsilə ayrılan xərclər isə ölkə büdcəsinin 15%-dən çoxunu təşkil edir.
Dövlət məktəbləri milli standartlara əməl edir və ərəb dilində dərs deyir, geniş özəl sektor isə Amerika, Hindistan və ya digər ölkələrin təhsil standartlarından istifadə edərək başqa dillərdə tədris keçir. BƏƏ-yə gələn xarici tələbələr adətən özəl məktəblərdə və universitetlərdə təhsil alırlar.
BƏƏ-nin xarici tələbələr üçün ən cəlbedici əmirliklərindən biri Dubaydır. Onun iki yüzdən çox özəl məktəbi və bir neçə onlarla özəl universiteti, həmçinin 50 ingilis dili məktəbi var – 3.6 milyon əhalisi olan region üçün bu, əhəmiyyətli rəqəmdir.
Getdikcə daha çox xarici təhsil təşkilatı Dubayda öz nümayəndəliklərini yaradır. Bu il açılan dörd ali təhsil müəssisəsinin hamısı xaricidir. Onlar arasında iki biznes məktəbi, Hindistanın beynəlxalq “Symbiosis” universiteti və Plexanov adına Rusiya İqtisadiyyat Universiteti var.
Dubayda artıq mövcud olan dünyaca məşhur universitetlər arasında Sorbonnanı misal göstərmək olar. Qeyd edək ki, universitetlərin ərəb filial kampuslarında təhsil haqları adətən əsas kampuslardan aşağı olur.
2040-cı ilə qədər əmirlik öz ərazisində daha 10-15 xarici universitet filialının açılmasını gözləyir. Və bu, olduqca realdır: təkcə 2024-cü ildə dünyanın hər yerindən 70-ə yaxın universitet BƏƏ bazarına daxil olmaqda maraqlı olduğunu bildirib.
Beynəlxalq təhsil sahəsində ənənəvi liderlər olan ABŞ, Böyük Britaniya, Kanada və Avstraliya tələbə vizasının alınmasını çətinləşdirdiyi halda, Dubay immiqrasiya siyasətini yumşaltmağa davam edir. Məsələn, bir əcnəbi dil məktəbini bitirdikdən sonra universitetə qəbul ola və ya öz ixtisası üzrə iş tapa və əmirlikdə yaşamağa davam edə bilər.
Dubay əhalisinin 80%-i gəlmə olduğundan, demək olar ki, hamı ingiliscə danışır. Nəhayət, əmirlikdə gənc mütəxəssislərə yüksək tələbat var. Bütün bunlar Dubaya çoxlu sayda beynəlxalq tələbə cəlb edir: bu gün burada 170 ölkədən tələbələr təhsil alır. Beləliklə, Dubay getdikcə özünü yeni qlobal təhsil mərkəzi kimi tanıdır.
