Dubay fond bazarı 2012-ci ildən bəri təsirli nəticələr nümayiş etdirir. İnvestorlar əmirliyin iqtisadiyyatının dayanıqlılığına inanır və neft bazarındakı və süni intellekt sektorundakı volatillikdən çəkinmirlər.
Dubayın maliyyə indeksi — tərkibinə “Emirates NBD Bank PJSC” və “Emaar Properties PJSC” kimi şirkətlər daxildir — cari ilin əvvəlindən bəri 11%-dən çox artıb.
Bu yüksəliş altı il əvvəl başlayan tendensiyanın davamıdır: həmin dövrdə indeks 300% artmışdı. Artım istehlakın yüksəlməsi, daşınmaz əmlak bumunun güclənməsi və maliyyə xidmətlərinin genişlənməsi ilə əlaqələndirilir. Neft Səudiyyə Ərəbistanı və Əbu-Dabi kimi bazarlar üçün hələ də mühüm amil olsa da, Dubayın ÜDM-nin 95%-i daşınmaz əmlak, maliyyə və pərakəndə ticarət sektorlarının payına düşür.
Banklar və daşınmaz əmlak
İlin artımının təxminən 60%-i “Emirates NBD” və “Emaar” qrupunun payına düşüb.
“Emirates NBD” səhmləri 33% yüksəlib. Analitiklər bunu yüksək xalis faiz marjası və kreditləşmənin artması ilə izah edirlər. Dünyanın ən hündür binası olan Burj Khalifa və ən böyük ticarət mərkəzlərindən biri Dubai Mall ilə tanınan “Emaar” qrupu da daşınmaz əmlak bumunun fonunda sabit mənfəət hesabına iki rəqəmli artım göstərib. Bu artım bazarda lüks seqmentin həddindən artıq doyması ilə bağlı narahatlıqlara baxmayaraq baş verib.
“Bloomberg Intelligence”in proqnozuna görə, BƏƏ regiondakı rəqiblərini artım tempinə görə geridə qoyacaq. Beynəlxalq Valyuta Fondu 2026-cı ilə qədər real ÜDM-in 5% artacağını gözləyir.
“Bokor-Inqram” qeyd edir ki, güclü iqtisadi artım şirkətlərin maliyyə göstəricilərində əks olunur: “Əhalinin artımı, turizmin və şəhər aktivliyinin yüksəlməsi birjada listinqdə olan şirkətlərin gəlir və mənfəət artımında aydın görünür.”
Dubay bazarının qiymətləndirilməsi də cəlbedici olaraq qalır. Son beş ildə əmirliyin fond indeksi MSCI Inc.-in inkişaf etməkdə olan bazarlar indeksini 18 dəfə üstələyib. Hazırda isə bazar P/E əmsalı 11 səviyyəsində ticarət olunur ki, bu da oxşar inkişaf etməkdə olan bazarların orta göstəricisi olan 13-dən aşağıdır.
Bəzi investorlar üstün artım tempinin davamlılığına şübhə ilə yanaşırlar. DWS şirkətinin portfel meneceri Sebastian Kalfeld hesab edir ki, süni intellekt sahəsində aktiv inkişaf edən daha iri inkişaf etməkdə olan bazarlarla müqayisədə Dubay geri qala bilər. O, həmçinin qeyd edir ki, Dubayın iri şirkətləri daha yavaş tempdə böyüyür.
Buna baxmayaraq, Kalfeld düşünür ki, süni intellekt şirkətlərinə maraq azalarsa, Dubay bazarı bundan faydalana bilər. Güclü iqtisadi artım və Dubayın neft kimi qeyri-sabit xammal bazarlarından nisbətən asılı olmaması yaxın aylarda fond bazarını dəstəkləyəcək.
