Beynəlxalq Valyuta Fondunun (BVF) məlumatına görə, qlobal dövlət borcu təxminən 111 trilyon dollardır. Real ifadədə bu, COVID dövrünün maksimum göstəricilərindən aşağı olsa da, dünya ÜDM-i ilə müqayisədə hələ də çox yüksəkdir.
Cari ildə qlobal dövlət borcu 8,3 trilyon dollar artıb və onun dünya ÜDM-inə nisbəti 94,7%-ə çatıb (+30 baza bəndi). ABŞ və Çinin birgə payı bütün dünya dövlət borcunun 51,3%-ni təşkil edir.
ABŞ-nin dövlət borcu 38 trilyon dolları keçib və ölkənin ÜDM-inə nisbəti 125%-dir. Son beş ildə ABŞ-nin dövlət borcu üzrə xalis ödənişləri demək olar ki, üç dəfə artıb və proqnozlara görə, 2035-ci ilə qədər daha iki dəfə artaraq illik 1,8 trilyon dollara çatacaq.
Dövlət borcunun həcminə görə ikinci yeri 18,7 trilyon dollarla Çin tutur. Cari ildə göstərici stimullaşdırma tədbirləri və torpaq satışından gəlirlərin azalması fonunda 2,2 trilyon dollar artıb.
Yaponiyanın dövlət borcu 9,8 trilyon dollar səviyyəsindədir və ölkənin ÜDM-inin 230%-inə bərabərdir. Buna baxmayaraq, Yaponiyanın yeni Baş naziri Sanae Takaiti 92,2 milyard dollarlıq stimullaşdırma və subsidiya proqramı təklif edir.
