“ApeX Protocol”un son hesabatına görə, Sinqapur və BƏƏ kriptovalyutadan “ən çox asılı olan” ölkələrdir. Sinqapur ümumi 100 xal toplayaraq birinci olub. Bu göstəriciyə səbəb ölkə əhalisinin 24.4%-nin kriptovalyutaya sahib olması və axtarış fəallığında dünya lideri olmasıdır – hər 100 min nəfərə 2000 kripto ilə bağlı sorğu düşür. 2021-ci ildə yalnız 11% sinqapurlunun rəqəmsal aktivləri vardı, lakin növbəti ilədək bu göstərici iki dəfədən çox artıb.
BƏƏ isə 99.7 xal toplayaraq ikincidir. Bu Fars körfəzi ölkəsində 2019-cu ildən kriptovalyuta istifadəsi 210% artıb, xüsusilə 2022-ci ildə əhalinin 34%-dən çoxu kriptovalyutaya sahib olduğunu bildirib.
Araşdırmada hər bir ölkənin cəlbediciliyi dörd meyar üzrə qiymətləndirilib: kriptovalyuta sahibliyi səviyyəsi, istifadənin artımı, axtarış fəallığı və bankomatların əlçatanlığı.
ABŞ 98.5 xalla üçüncü yeri tutub. İnkişaf etmiş infrastruktur sayəsində ABŞ kriptovalyuta bankomatlarının əlçatanlığında liderdir – 30 mindən çox bankomatla digər ölkələrdən 10 dəfə çox. Həmçinin burada 2019-cu ildən kriptovalyuta istifadəsi 220% artıb.
Kanada 64.7 xalla dördüncü yerdə qərarlaşıb. Burada kriptovalyuta istifadəsinin artım tempi ən yüksək olub – 225%. Hazırda əhalinin 10.1%-i kriptovalyutaya sahibdir, ölkə üzrə isə 3500-dən çox bankomat mövcuddur.
Türkiyə 57.6 xalla ilk beşliyi tamamlayıb. Burada əhalinin 19.3%-i kriptovalyutaya sahibdir ki, bu göstəriciyə görə dünya üzrə üçüncü yerdədir. Aylıq axtarış həcmi də yüksək olaraq qalır – hər 100 min nəfərə təqribən 1000 sorğu.
İlk onluqda həmçinin Almaniya (48,4), İsveçrə (46.2), Avstraliya (45.1), Argentina (37.6) və İndoneziya (37.1) yer alır. Bu ölkələrin hər biri artan tətbiq, inkişaf etmiş infrastruktur və ictimai marağın yüksəlişi ilə seçilir.
