Ukrayna münaqişəsinin nizamlanması üzrə məsləhətləşmələrin iştirakçıları Əbu-Dabidə danışıqların keçirildiyi məkandan ayrılırlar. Bu barədə Ukrayna Milli Təhlükəsizlik və Müdafiə Şurası katibinin mətbuat katibi Diana Davityan və Ukrayna Prezident Ofisinin rəhbəri Kirill Budanov bildirib.
“Danışıqlar həqiqətən konstruktiv keçdi. Keyfiyyətli təşkilatçılıq və vasitəçilik üçün ABŞ və BƏƏ-yə minnətdaram”, — deyə Budanov bildirib.
İki gün davam edən Əbu-Dabi danışıqlarının yekunlarına dair kommünikenin BƏƏ tərəfindən yayımlanacağı gözlənilir.
Danışıqların nəticəsi olaraq Rusiya və Ukrayna “157-yə 157” formulu ilə əsir mübadiləsi həyata keçiriblər. ABŞ prezidentinin xüsusi nümayəndəsi Stiv Uitkoff danışıqların məhsuldar və detallı olduğunu bildirib. Oxşar açıqlama Ukrayna tərəfi tərəfindən də verilib.
Kreml hesab edir ki, yekun nəticələr çıxarmaq üçün hələ tezdir, çünki nümayəndə heyəti görüşlərin gedişi barədə Rusiya liderinə hesabat verməyə davam edir. Rusiya prezidentinin xüsusi nümayəndəsi Kirill Dmitriyev isə dialoqda “şübhəsiz ki, irəliləyişin olduğunu” qeyd edib.
Tərəflər danışıqların əsas mövzusu kimi ərazi məsələsini göstəriblər. Həmçinin Ukraynada sülhməramlıların yerləşdirilməsi məsələsi də müzakirə olunub. Bu şərt “hamını qane etmədiyi” üçün təhlükəsizlik zəmanətləri “çoxmillətli qüvvələrin” operativ reaksiyasını da əhatə edə bilər.
“Politico” daha əvvəl Ukrayna və ABŞ rəsmiləri ilə söhbətə əsasən yazmışdı ki, danışıqların ikinci raundu gözləniləndən daha ümidverici ola bilər. Nəşrin həmsöhbəti “yaza qədər bu münaqişəni bitirmək üçün real şansların olduğunu” bildirib.
Ukrayna Prezidenti Volodimir Zelenski fevralın 2-də Kiyevin “real addımlara” hazır olduğunu deyib. Onun sözlərinə görə, hazırda “ləyaqətli və davamlı sülhə nail olmaq realdır”. Bundan əvvəl ABŞ lideri Donald Tramp da tərəflərin nizamlanmaya yaxınlaşdığını və qarşıdakı danışıqların uğurlu ola biləcəyini bildirmişdi.
