Fransa hökuməti futbol üzrə Avropa çempionatı ilə əlaqədar mobil telefonlar üçün xüsusi proqram əlavəsi hazırlayıb.
Proqram əlavəsi ictimaiyyəti terror təhlükəsi barədə xəbərdar etməlidir. Hökumətdən bildiriblər ki, əlavə ötən ilin noyabrında Parisdə baş vermiş terror aktlarından sonra işlənib, hazırlanıb.
İstifadəçilər əlavəni yükləməklə müxtəlif coğrafi zonalarda – 8-ə qədər ərazidə təhlükələr barədə xəbərdarlıq ala biləcəklər. Xəbərdarlıqda baş verən hadisə barədə qısa məlumat veriləcək və təhlükəsiz şəraitdə qalmaq üçün tövsiyələr əksini tapacaq. İstifadəçilərin konfidensiallığı qorunacaq.
Əlavəni “Android” və İOC əməliyyat sistemlərində işləyən smartfonlara yükləmək mümkündür.
Qeyd edək ki, bu həftə Böyük Britaniya hökuməti öz vətəndaşlarına “Avro-2016” sırasında terror hücumları baş verə biləcəyi ilə bağlı xəbərdarlıq edib. Britaniya XİN hesab edir ki, stadionlar, fan-zonalar və nəqliyyat arteriyaları terrorçuların hədəfindədir.
Lent.az
