“Expressbank” ASC 2021-ci ilin I rübünə dair maliyyə göstəricilərini açıqlayıb. Hesabata əsasən, Bank bu ilin ilk rübünü 3.1 milyon xalis mənfəətlə başa vurub.
2021-ci ilin I rübünün nəticələrinə görə “Expressbank” ASC Mərkəzi Bank tərəfindən müəyyən olunmuş bütün prudensial normativləri də yüksək səviyyədə yerinə yetirib. Belə ki, 31 mart 2021-ci il tarixində Bankın I dərəcəli kapitalın adekvatlıq əmsalı 47.3%, məcmu kapital adekvatlığı 49.6%, leverec əmsalı isə 35.5% təşkil edib. Bankın tutulmalardan sonra I dərəcəli kapitalı 114.9 milyon manat, məcmu kapitalı isə 120.47 milyon manat təşkil edib. “Expressbank” ASC-nin ümumi kapitalı isə keçən ilin sonu ilə müqayisədə 2% artaraq 124 milyon manat təşkil edib. Qeyd olunan göstəricilər bir daha bankın maliyyə cəhətdən sağlam və dayanıqlı olduğunu sübut edir.
Bu ilin əvvəlindən başlayaraq “Expressbank” ASC müştərilərinə əlverişli şərtlərlə müxtəlif kredit kampaniyaları təqdim edib. Nəticədə Bankın 2021-ci ilin ilk rübü ərzində rəsmiləşdirdiyi biznes və istehlak kreditlərinin həcmi 45.43 milyon manat, rübün sonuna Bankın ümumi kredit portfelinin həcmi isə 213.24 milyon manat təşkil edib.
Sahibkarlığın İnkişafı Fondu ilə əməkdaşlıq çərçivəsində Bank keçən ilin avqust ayından etibarən pandemiyadan zərər çəkmiş sahibkarlara dövlət zəmanəti əsasında, güzəştli şərtlərlə kreditlər təqdim etməyə başlayıb. Keçən ilin son rübü ilə müqayisədə cari ilin ilk rübündə subsidiyalı kreditlərin həcmi 76% artaraq 4.7 milyon manat təşkil edib.
“Expressbank” ASC-nin depozit portfelində keçən ilin son rübü ilə müqayisədə artım müşahidə olunub. Belə ki, depozit portfeli 4.6% artaraq 64.23 milyon manat təşkil edib. Cari ilin ilk rübü Bank 17 milyon manatdan artıq depozit cəlb edib.
2021-ci ilin I rübünün nəticələrinə əsasən, Bankın ödəniş kartları ilə aparılan nağdsız ödənişlərinin ümumi dövriyyəsi 43.05 milyon manat, təmassız qaydada aparılan ödənişlərin dövriyyəsi isə 4,03 milyon manat təşkil edib. Bu göstəricilər bankın nağdsız ödənişlərin təşviqatına dəstəyini əks etdirir.
Biznes və pərakəndə bankçılıq sahəsində geniş çeşiddə bank məhsulu və xidmətlər təklif edən Expressbank-ın ölkə ərazisində 15 filialı mövcuddur. Bank haqqında ətraflı məlumatı 132 Məlumat Mərkəzinə zəng edərək, www.expressbank.az saytından və ya bankın sosial şəbəkələrdəki rəsmi səhifələrindən əldə edə bilərsiniz.
