“Expressbank” ASC-nin 2026-cı ilin ilk yarısında müştərilərə verdiyi kreditlərin həcmi 567,8 milyon manata çatıb.
Banker.az bankın yarım il üçün açıqladığı maliyyə hesabatına istinadən xəbər verir ki, bu, ötən ilin eyni dövründəki 547,7 milyon manatla müqayisədə 20,1 milyon manat və ya 3,7% çoxdur.
Kreditlər üzrə mümkün zərərlər üçün yaradılmış ehtiyatlar 12,98 milyon manatdan 12,18 milyon manata enib ki, bu da bankın xalis kredit portfelinin 536,7 milyon manatdan 555,6 milyon manata yüksəlməsinə imkan verib.
Kredit portfelinin strukturunda ən böyük artım biznes kreditləri üzrə qeydə alınıb. Bu seqment üzrə portfel 199,2 milyon manatdan 209,4 milyon manata yüksələrək 5,1% artıb. İstehlak kreditləri 228,4 milyon manatdan 231,7 milyon manata çataraq 1,5% böyüyüb. Daşınmaz əmlak kreditləri isə 122,1 milyon manatdan 126,7 milyon manata yüksəlib ki, bu da illik müqayisədə 3,7% artım deməkdir.
Bankın faiz gəlirlərinin əsas hissəsini də kredit portfeli formalaşdırmaqdadır. Müştərilərə verilmiş kreditlərdən əldə olunan faiz gəlirləri 37,9 milyon manatdan 43,8 milyon manata yüksələrək 15,8% artıb. Nəticədə ümumi faiz gəlirləri 45,9 milyon manata çatıb ki, bu da illik müqayisədə 15,2% çoxdur. Xalis faiz gəlirləri isə 26,1 milyon manatdan 28,9 milyon manata yüksələrək 10,6% artıb.
Kredit portfelinin genişlənməsi bankın gəlirliliyinə də müsbət təsir göstərib. Əməliyyat mənfəəti 10,6 milyon manatdan 12,8 milyon manata yüksələrək 20,7% artıb. Kreditlər üzrə mümkün zərərlər üçün yaradılan məqsədli ehtiyat xərcləri isə 5,02 milyon manatdan 3,48 milyon manata enərək 30,6% azalıb.
