“Financial Times” (FT) qəzetinin mənbələrə istinadla yazdığına görə, Avropa İttifaqı ölkələri ABŞ mənşəli mallara ümumilikdə 93 milyard avro məbləğində rüsumların tətbiqini nəzərdən keçirir. Nəşrin həmsöhbətlərinin sözlərinə görə, bu addım ABŞ prezidenti Donald Trampın Qrenlandiyanı ələ keçirmə niyyətindən narazı qalan NATO-nun səsləndirdiyi təhdidlərə cavab ola bilər.
Layihənin hazırlanmasında iştirak edən rəsmi şəxslərin bildirdiyinə görə, cavab rüsumları Avropa liderlərinə ABŞ prezidenti ilə Dünya İqtisadi Forumu çərçivəsində keçiriləcək görüşlərdə təsir rıçaqları vermək məqsədi daşıyır. Forum 19–23 yanvar tarixlərində Davosda keçiriləcək.
Tariflər siyahısı 2025-ci ildə hazırlanıb. FT qeyd edir ki, genişmiqyaslı ticarət müharibəsindən qaçmaq üçün onun tətbiqi 6 fevraladək təxirə salınıb. Rüsumların tətbiqi məsələsi 18 yanvar tarixində Aİ səfirlərinin fövqəladə iclasında yenidən müzakirə olunub. Bundan əlavə, danışıqlarda “məcburiyyətə qarşı alət” və ya “ticarət bazukası” adlandırılan mexanizm də gündəmə gətirilib ki, bu da Amerika şirkətlərinin Aİ-nin daxili bazarına çıxışını məhdudlaşdıra bilər.
“Reuters” mənbələrə istinadla yazır ki, Vaşinqtonla razılaşma əldə olunmasa, Aİ-nin cavab sanksiyaları avtomatik olaraq 6 fevral tarixində qüvvəyə minəcək. Bununla belə, avropalı diplomatların birinin sözlərinə görə, Avropa İttifaqı hələlik ABŞ-yə qarşı əks-tədbirlərin tətbiqini planlaşdırmır.
Daha əvvəl Donald Tramp 1 fevraladək Qrenlandiyada hərbi təlimlər keçirmək üçün qoşun göndərən ölkələrdən — Danimarka, Norveç, Fransa, Almaniya, Böyük Britaniya, Niderland və Finlandiyadan idxal olunan mallara rüsumlar tətbiq edəcəyini vəd etmişdi.
