“Fitch Ratings” Azərbaycanın inflyasiya və iqtisadi artım proqnozlarını açıqlayıb.
Bu barədə reytinq agentliyinin məlumatında bildirilib.
“Fitch” qeyd edib ki, 2025-ci ilin may ayında illik inflyasiya 5,9%-ə yüksəlib, bu da qismən baza effektləri və 2025-ci ilin I rübündə minimum əməkhaqqının artırılması ilə bağlıdır. Fitch 2025-ci il üzrə illik orta inflyasiyanın 5,3%, 2026-cı ildə isə 4,6% olacağını proqnozlaşdırır.
“Bu göstəricilər Mərkəzi Bankın hədəf diapazonuna (4% ± 2 faiz bəndi) uyğundur. Agentlik 2026-cı ilə qədər faiz dərəcələrinin azaldılacağını gözləmir”- agentlik qeyd edib.
“Fitch” 2025-ci ildə tam illik iqtisadi artımın 3,5% (2024-cü ildə: 4,1%), 2026-cı ildə isə 2,5% olacağını gözləyir. Bu artımda dövlət investisiyaları və neftdənkənar sektorlar əsas rol oynayacağı qeyd edilib.
“İqtisadi diversifikasiya istiqamətində irəliləyişlər məhduddur. Belə ki, karbohidrogenlər ÜDM-in 32%-ni və ixracın 90%-ə qədərini təşkil edir. Diversifikasiyanı əngəlləyən amillərə iqtisadiyyatda dövlətin böyük payı, məhdud maliyyə vasitəçiliyi, idarəetmə problemləri və qeyri-enerji sektoruna xarici investisiyanın zəifliyi daxildir”- Agentliyin şərhində bildirilib.
