“Fitch Ratings” beynəlxalq reytinq agentliyi hesab edir ki, Ukraynada münaqişənin mümkün nizamlanması “MDB+” ölkələrinin (Azərbaycan, Gürcüstan, Ermənistan, Qazaxıstan, Özbəkistan və Qırğızıstan) bank sektorlarına məhdud qısamüddətli təsir göstərəcək.
Geosiyasi risklərin və ikinci dərəcəli sanksiya risklərinin potensial azalması bütün regiona müsbət təsir göstərəcək.
Bununla belə, agentlik qeyd edib ki, bank sektorlarına birbaşa təsir – və daha geniş mənada bankların kredit profillərinə təsir minimal olacaq.
Rusiya və Ukrayna arasında 2022-ci ildə münaqişənin başlanmasından bəri region bankları Rusiyadan insanların və kapitalın miqrasiyası nəticəsində yaranan makroiqtisadi nəticələrdən faydalanıblar. Bu, bir sıra ölkələrdə iqtisadi fəallığın, gəlirlərin və likvidliyin artmasına kömək edib.
Bu axınların qismən əks istiqamətdə qayıtmasına baxmayaraq, “Fitch” hesab edir ki, bu dəyişikliklər struktur xarakterlidir və münaqişənin sülh yolu ilə həll edildiyi təqdirdə belə köklü şəkildə yenidən nəzərdən keçirilməsi ehtimalı azdır.
“Baza ssenarimizə görə, münaqişənin həllinin “MDB+” ölkələrinin banklarının kredit profillərinə təsiri məhduddur. Onların dayanıqlılığı geosiyasətdən daha çox daxili amillərdən asılıdır”, – agentliyin hesabatında bildirilib.
“Fitch” qeyd edir ki, son 3 ilin yüksək iqtisadi artım tempi kreditləşmənin genişlənməsinə kömək edib. Xüsusilə Ermənistan, Gürcüstan və Qırğızıstan bankları faydalanıblar. Bu da əsasən valyuta əməliyyatlarının və Rusiya ilə ticarətin artması ilə bağlı komissiya gəlirlərinin yüksəlməsi hesabına qazanıblar, bu ticarət indi əsasən “MDB+” ölkələri vasitəsilə həyata keçirilir.
“Fitch” proqnozlaşdırır ki, dəyişən geosiyasətin təzyiqi altında formalaşan bu yeni ticarət marşrutları, sanksiyalar ləğv edilsə belə ümumiyyətlə qorunub saxlanacaq: “Rusiya strateji səbəblərə görə alternativ tədarük zəncirlərini saxlamağa çalışacaq”.
Agentlik xəbərdarlıq edir ki, əhəmiyyətli kapital axını region valyutalarına təzyiqi artıra bilər ki, bu da Gürcüstan və Ermənistan kimi bank sektoru yüksək dollarlaşmış ölkələr üçün xüsusilə risklidir.
Lakin “Fitch”in məlumatına görə, bu ssenari az ehtimallıdır: “Biz gözləyirik ki, “MDB+” banklarındakı hesablar valyuta əməliyyatlarının təmin edilməsində mühüm rol oynamağa davam edəcək”.
