Tayvanın elektronika istehsalçısı “Foxconn” şirkətinin rəhbəri Yun Liu Taybeydə keçirilən “Computex Taipei” texnologiya sərgisində çıxış edərək bildirib ki, generativ süni intellekt (AI) sənaye müəssisələrində istehsal yükünün yalnız 80%-ni idarə edə biləcək. O əlavə edib ki, əməliyyatların 20%-ni yerinə yetirmək üçün hələ də ixtisaslı işçilərə ehtiyac olacaq.
Yun Liu deyib ki, bunlar “Foxconn” tərəfindən aparılan daxili araşdırmanın nəticələridir və şirkət rəhbərliyinin özü üçün sürprizdir. Təcrübə zamanı məlum olub ki, süni intellekt iş prosesində avadanlığın quraşdırılması və nasazlıqların aradan qaldırılması kimi sahələrdə bilik toplayır və əməliyyatların təxminən 80%-də insanları əvəz edə bilir. Bununla belə, qalan 20% iş hələ də insanlar tərəfindən daha yaxşı görülür.
“Bu təcrübədən əvvəl biz düşündük ki, bəlkə bütün insanları əvəz edə bilərik. Lakin insanlar generativ süni intellektdən qat-qat yaxşı işləyirlər”, – Yun Liu bildirib.
