Fransa və Böyük Britaniya Hörmüz boğazında gəmiçiliyin təhlükəsizliyinin təmin olunmasını müzakirə etmək üçün beynəlxalq konfrans təşkil edəcək. Konfrans ABŞ və İsrailin İrana qarşı müharibəsində iştirak etmədən həyata keçiriləcək. Bu barədə Fransa prezidenti Emmanuel Makron bildirib.
“Yaxın günlərdə biz Birləşmiş Krallıqla birlikdə bizimlə birgə çoxmillətli sülh missiyasına töhfə verməyə hazır olan ölkələrin iştirakı ilə konfrans təşkil edəcəyik. Bu missiyanın məqsədi boğazda gəmiçiliyin azadlığını bərpa etməkdir. Bu, müharibə tərəfləri ilə əlaqəsi olmayan, sırf müdafiə xarakterli missiyadır və şərait imkan verən kimi həyata keçiriləcək”, — deyə o, “X” platformasında yazıb.
Dövlət başçısı münaqişənin diplomatik yolla tezliklə sabit və uzunmüddətli həllinin vacibliyini vurğulayıb. Onun sözlərinə görə, bunun üçün İranın raket və nüvə proqramları, eləcə də regiondakı “destabilləşdirici fəaliyyəti” kimi məsələlər üzrə uzunmüddətli həll yolları tapılmalıdır.
Makron həmçinin bildirib ki, Hörmüz boğazında gəmiçiliyin bərpası ilə yanaşı, Livanın suverenliyinə tam hörmət çərçivəsində “sülh yoluna qayıtmasına” nail olmaq da vacibdir və Fransa bu prosesə töhfə verməyə hazırdır.
